خان القصيد اللي بظهر الصحايف=وحارت بي الكلمه على روس الاقلام
واخذت لي مده من الرد خايف=عذري معي يا خوك من خوف لنلام
والحال يا خالي مثل منت شايف=من قوة ابياتك حَـدَنَّــي للاحجام
الين شفت الراس جوّه تكايف=يحوم به من شارد الفكر حوام
والبال طوّف به من الشعر طايف=وقعدت الوّنها تقل لوح رسام
ياسعود ما والله تشوف الحسايف=نطيح دون الموت من قبل تنضام
ربعك هل العشوى نهار الكلايف=امغمقين الطعن في مر الايام
خيولهم بالكون تقبل وجايف=لحوض المنايا وِردهم ورد صيام
ان كان همك من حسِين الوصايف=ام الغنج والدلعنه بنت الاكرام
اللي زهاها لبسها للغدايف=اكبر امانيها تشوفك بالاحلام
ويلك على مصة حمار الشفايف=لا شفت طلع التين في صدرها زام
ابو ثمانٍ يوم يبسم صفايف=كسولة الرمشين نظراتها اسهام
نمشي لشوقك من جميع الطوايف=بالدين والسنه على شرع الاسلام
ونجيبها يا سعود لو هي خطايف=بس انت اشّر .. والمطانيخ قداااااااام
هذي هي الدنيا بحال الولايف=قانونها بالحب معكوس الاحكام
حياتهم ياخوك همّ وكسايف=واوقاتهم ما بين لايم ولوّام
طبعي .. اعاف اللي عن الوصل عايف=والله ولامثله قعد عندي وقام
وعلاجها ياخوك بارض المصايف=( لا ضاق بالك اكد الحجز للشام)