عنجهيات الخطايا عانقة طرد السراب=في لجاجات الحنايا لا احتمى هجر الوطيس
انقضى عهد النوايا واختفى نزف القراب=ماعلى اشواقه مطايا لجل مجموله يقيس
ماتت اوراق العطايا في بساتين الخراب=نشت ارجاء الخفايا وانقلب وجه الغريس

يامرحبا والقاف بصمه وبرهان=من شاعرٍ بالطيب حافظ مساره
شخصٍ تجلّى حايفٍ كل الاوزان=مالك ملاك البوح اسمه شعاره
يالراشد الصنديد ياحي بلهان=ياللي على الغبات كتفه دماره
يابو فهد ياسعد من جاك شقيان=ياعز من جِلّي عن ارضه وداره
خلف خليف المجد للمجد عنوان=سلايل اللي بالملاقى مناره
يقلط على وضح النقا شوف الاعيان=يخلف صفوف الغير باس وسطاره
عاداتكم يالذيب ماهي بالاحيان=ترجس على كبد المعادي شراره
تحرق فؤاده من بعد حرق قيفان=من وين ماوجّه تَهدّم عماره
يالوايلي صاحبك ماهو ببلشان=ينشف لهاة الضد وييبس خضاره
ماهو على ماقيل ضايق وزملان=الوضع هادي دون عين وحماره
واللي لفى متوسد الغدر نيشان=دارت دواير لفته في مداره
من يحفر الحفره على مر الازمان=ياقع بها والنفس تتبع لكاره
واللي جهل في جوهريات الاديان=برد وسلامٍ ياعشيري بمغاره
هذا واذا قالوا ترى المعترك حان=مثلك حِزامٍ نايفٍ في سماره

ولى زمان وقضى يالبيت ما جيتك=وانا اللي اول اسوق الرجل لك عجلى
ماهي على الكيف لا تندهني اغليتك=النفس من غبة التأنيب بالنجلى
فان كان شفت الوصف بالقرب واخطيتك=العذر من حضرتن بها الغلا خجلى
خلاص روّح زمانٍ فيه حبيتك=واللي حداني خطا روحٍ غدت وجلى

العيون اللي تقض الشال من حسنٍ بها=صوبتني واتركتني في متاهة شالها
واعذابي لو لفتني تطلب العونه لها=مادرت بالقلب يصرخ : واهني من نالها

انحني لك من غلا بقلبي سطا=وارتخي لك لو قطعتي لي الوتين
من تغذى بالهوا غصبٍ عطا=ما تخاسر عمر لعيون الظنين

في زمانٍ اقشرٍ عدّا وراح=ثارت الدمعه من اوزار الخليل
شخص اعدّه راس مالي والرباح=كنت اظنه نادر العمله قليل
مادريت ان الهوى ليل و صباح=وحب ليله يمسحه صبح الدليل
ليت حظي مانتهض مني وطاح=كسرة العظم القوي جبره عليل
وليت عمري مارضى لي بالنواح=في سبيل الوصل وظلال الظليل
ياخسارة ما زواني بانسطاح=من عميلٍ ناكر العشره ذليل
وياحسافة هاجسٍ هام السماح=امتطى العليا على صهوة جليل
الجروح النازفه تبقى جراح=مايلطّف لطمها شيمة سليل
هو زمانٍ اقشرٍ عدا وراح=جمرته لا شك ماعضّة شليل
ولو يعود الوقت لو هو بالمزاح=حالفٍ لشفي غليلي من الخليل