مدام المجتهد راعي طموح ولا يِعَرْف اليـاس
قوي عْزوم ما يحني لغير اللي خَلَـق راسـه

أبا اسعى واجتهد واشْهَر مِثِل مايَشْهر القرناس
وادوّن بالقصايد كل حرفٍ صـادق احساسـه

حسب علمي وانا رجلٍ يقيس الشيّ بالمقياس
وعلمي ماخذه ميراث جـد وكسْـب ودراسـه

بزغ فجري على الدنيا ضحوك وعاطر الأنفاس
ونهجي منهج اهل الحق والتوحيـد نبراسـه

عريب الساس لوغيري كثير معربين السـاس
ولي مبدا ولاعشت الحيـاه مْضيّـع الطاسـه

وِاذا شفت الخطا ماقول انا مالـي وماللنـاس
أنا رَجْلٍ يعدّل عن خطاه وعـن خطـا ناسـه

والا ياصاحب المنصب وراع المركز الحسّاس
ترى ثوب الكِبِر ثوبٍ يعيب بْشَخْـص لبّاسـه

فلاتغتر بالدنيا وخـذ عبـره مـن العسـاس
يجر خطاه والبن الخضـر مايجلـي عماسـه

رحل يبحث عن كنوز الجواهر والذهب والماس
وداس اللي ماحد قبله من اهل المعرفه داسـه

وبعد شاف الاراضي بور وجذوع النخل يباس
نثر دمعه على خدّه وضاق الصـدر بانفاسـه

وهذي حالة الدنيا وحال اللـي بهـا غطّـاس
ليا منّه طِمِـع فيهـا يعـوّد يعْلِـن افلاسـه

حقيقه وانت ماتجهل معاني كاسب النومـاس
بعد ما صبِّ لك ماه الزلال ومـدِّ لِـك كاسـه

عساك تحِس واليا كنت واحد فاقد الإحسـاس
فلاتجرح شعور الناس دام النـاس حسّاسـه

أقوله وانت تدري بِانْ مِثلي مايِعَـرْف اليـاس
قوي عْزوم مايحني لغير اللـي خَلَـق راسـه



http://www.dewan.saudihit.com/pic/40.jpg