ياأنت ياللي كل ماقلت لي (هيه)=يرجع يرد القلب لبيه لبيه
لبيه يارجفة عظامي من الشوق=ولبيه ياأول حنيني وتاليه
ولبيه ياخفقة خفوقي ليا مر=طيفك على عجلاً وانا قمت اناديه
ولبيه ياصرخة ضلوعي من البرد=(لاغبت عني والوله مد يديه)
ولبيه ياسحراً غشاني ولاعدت=أبصر سواه من المخاليق وارجيه
ولبيه يانبضاً مع الدم موجود=يضخ في شريان صدري ويسقيه
ولبيه ياعشقاً شربته ولازلت=أظما واجوع أن حل بالبال طاريه
ياأنت ياقمة شعوري أذا جيت=بعزف شعوري للقوافي واغنيه
وياأنت يابرستيج ياذوق لاصار=يمك شجي الحرف ناوي تحديه
ياانت ياكلّي و كل شي مني = (يالعمر كله من اوله لين تاليه)
(ياأكسوجيني ياسجين المحاني =بقلبٍ وجودك كنه الروح يحييه)
ياحاجتي يامطمعي ياتفاصيل=أحلام حلمي في حقيقة تمنيه
مادامني من حد ضلعك تكونت=مابيني وبينك عتاب ومشاريه
ولابيننا قصة كرامه أو حدود=وشعورنا واحد لو أحيان نخفيه
يااقرب من الدنيا وأهلها بلا شك=آمر تدلل والخطا لك بمشيه
ماانت بمثل غيرك على شان ماقول=لبيه يااميري أذا قلت لي هيه
قل ماتبي ياهيه ياهنوه وش عاد=القلب قلبك وانت سيده وراعيه
تامر ولك سمعاً وطاعه على طول=ولاعاش من هو قال لك لا أو ليه