أرحبي يا سجيّة شاعرٍ هاض قافه = وارعدي يا سحبة وامطرينا بماكي
يا قلم لا تكل ولا تمل المسافة = انثر الحبر ثوبٍ للقصايد يحاكي
من طواريق منهو راح وقته حسافه = عند ناسٍ وصلهم ما حظى بالمراكي
كان يحسب مكانه في بلاط الخلافة = حتى لو مَِيحَصَل ان للخليفة يحاكي
لابس البشت مع من صنّفوا بالترافة = واثره امصنفٍ مع لابسين السواكي
يوم فرّ القَهَوجي ما حظى بارتشافة = ما درى انّه عزيز النفس ماهو بشاكي
له خفوقٍ قويٍّ ما تجيه ارتجافة = ظاريٍ للطعون ولا خسر بالعراكي
من وصل له شبابه ما حظى باللطافة = خشّنته الليالي .. يالليالي نواكي
يالليالي أشد صروفك اليوم تافه = صاحبٍ لك قبل لا تعثرينه قواكي
صاحبٍ لك عطى بحره وحصل جفافه = من صحاب الفضا والبهرجة والضحاكي
ما دروا عن مغلّف نازعينٍ غلافه = فتّح وشاف واقع كل ابوه انفكاكي
الغمام الي غطى العين حان انكشافه = هبّي يا نسمة الواقع وزيدي هواكي
خلي اللي ظمى والنهر هو في ضفافه = يعرف ان المجامل يبتليه ببلاكي
كم وكم سن يضحك فيه آفه وآفه = جايع لنهش لحمه ما ضحك كالملاكي
كم صديقٍ تعلاّ لازم انه يعافه = يقطعه حبل وصلٍ كان مثل الشراكي
لجل عين الكرامة لو هو شوكٍ قطافه = ما يهم .. قبل لا يا قع بواد الشواكي