خلك معي دام العرب مستشيطه=واترك هذاك اللي من بليس منفوخ
خلك بسيط وكل امورك بسيطه=وقابل سوالف تايه الراي بشموخ
وخل الغلط للي تحب الغليطه=اللي خفاياهم تطابخ لها بوخ
واسمع وكاد اللي سبوره غويطه=بهرجن مبين دون لفات وفخوخ
ترك السفيه يحسسه بالغبيطه=وينقز كما ينقز من النار صلبوخ
يزوم لكن زومته في محيطه=ويركد وكنه من على الوجه مصبوخ
لامن نغط لاتجاوبه في نغيطه=خله ويلقى مثل شكله له فروخ
ارفع مجالك لاتخبط خبيطه=وتصبح عقب سترك من الستر مصلوخ
البشت لو هو زاهيٍ لون خيطه=ماينلبس لاجاك بمتونه شلوخ
وهالوقت واجد فيه ناسن عبيطه=تمسي معك رعيان واتصبح شيوخ
لازم تكون لمثلهم فيك حيطه= غصن الرتم ماهقوتي يطرح الخوخ
وحذرى يغرك من يكرر شريطه=اللي تمرك كذبته تقل صاروخ
اللي عمامه يطلقون الربيطه=واللي خواله كلها تلبس الجوخ
كم طيبن بالقوم جده صقيطه=وكم صاقطن جده وليده ومطنوخ
الطيب ماهو بالعضود النشيطه=ولاهو بكثر المال في خزنة دلوخ
الطيب وهبه من اله البسيطه=من ضخ دم الادمي فيه مضخوخ
كم واحدٍ محتاج ثوبه يخيطه=وواجب ظيوفه حين يلفون مطبوخ
وكم وحدٍ ماله بماله خليطه=وعقله من اللي يكرم الظيف مفضوخ
حدد حدود المنطقه بالخريطه=والا العرب ياصاحبي كلها شيوخ