جيت المكان اللي لنا فيه وقفات =يوم الليالي عا مره بالصداقه

من دار نجد الين جيت السروات =والليل مسدل وسط عيني ارواقه

والحزن يرسم في خفوقي علامات=يمشي على كيفه ولاشي عاقه

وفي كل ركن القى معاني عن الذات =ضحكاتنا ,, ضيقاتنا ,, والطفاقه

واليوم كلن ضاربن له مسافات=في وادي الدنيا يشايع نياقه

وحنا نلوم الوقت في كل مافات=والوقت ماله بالقطاعه علاقه

ياشاطي ابحر وش بقى بالعلاقات=والوقت جوّد بالتفرق وثاقه

كنا هنا نكسر خشوم المعاناة=غصبن على جور الزمن واحتراقه

ماجمعتنا مصلحة ود او هات =نفرض تفاهمنا على كل عاقه

وماطاحت الهمه على شان هقوات=ولاضاعت الهقوه برووس الرفاقه

اربع رجالا فعلهم عز واثبات=ماهو مجرد كرت ولا بطاقه

ياشاطي ابحر ضاقت النفس بسكات=والصمت عن بعض السوالف شفاقه