قالوا شكى فقره على امير وارتاح = حتى لو انه سارقٍ له قصيده
0000العرب لا لسه الجوع نباح= وترما له القمه من يدين سيده
لو فاز بالشهره بصالات الافراح= ماهي مثل يوم المواقف شديده
انا نطحت الفقر بسيوف ورماح= وبيدت جيشا من جنوده عديده
يوم القناعه شلتها درع وسلاح= انا السعيد اللي ملكها رصيده
شف كيف شعري صار للناس مصباح= حتى العمى يبصر عليه البعيده
ماهمني وش كثر اجمع ووش راح= المال خلا الشيخ يتبع عبيده
والله لو ارجع مع الربع فلاح= ما ينحني راسى لمده زهيده
ترفعي يااذناب الامه بالارباح= فرصه لهزلين المبادي فريده
لا ضقت سجت الرجل في راس لوماح= ماتاصله غير الحرار الفريده
والغيم بالمنشى به البرق لماح= والله يسوقه للديار السعيده
وليا كسر وجه الدجى نور الاصباح= اشعلت من جمر الغضى لي وقيده
وسويت لي دله شذى هيلها فاح= تجلي هموم اللي حياته نكيده
شفت الطمع بين البشر مثل الا شباح= حتى على خيه يسوي مكيده
والله لو مااملك مع الناس مسباح= ما ذل نفسى يالنفوس البليده
والناس تسكنها المبادي بالارواح= وكلن على مبداه يرسل بريده
وان ماعطاك الله على الرزق مفتاح= محدن ترى ىجمع غناته على ايده