هانت محبتنا وفيني تهاونت..؟=حتى من الجوال رقمي مسحته
وانا الغريق اللي على صوتك (ادمنت)=سر(ن) ولاودي لك اليوم (بحته)

من خان عهد الحب خنا عهوده=والله ما احني هامتي واترجاه
باصد عنه قبل يعلن صدوده=اسعد حياتي يوم لحظات فرقاه
مشاعري ياما شكت من بروده=اثري تمنيته وغيري تمناه
ياما ذرفت الدمع سبة جموده=واليوم هليته ندم يوم عفناه
مابي معاذيره ولا ابغى ردوده=من باع قلبي بارخص اثمان بعناه
لو كان(جدي) واحدن من( جدوده)=حلفت وصله لاقطعه واتناساه
بحط له أكسٍ وادمر وجوده=حتى من الذكرى وفكري ابمحاه
حررت قلبي من سلاسل قيوده=ونزفت دمي لجل ترحل يقاياه
وارتاح بالي واستلذ بهجوده=وغفيت من بعد السهر والمعاناه
ونشوف من فينا قويٍ صموده=ومنهو على الثاني ندم يوم فرقاه!

كل عامٍ وانت يالغالي بخير= كل عيدٍ وانت عيدي يالغلا
تو زان العيد وافراحه تنير=اشرقت دنياي والحظ اعتلا
عيدي بشوفك وروحي لك تطير=كل عرقٍ صاح باسمك ياهلا
امتلكت القلب واصبحت الأمير=ارضخ لحكمك واقدم لك ولا

ماعاد باقي لي سوى ذكرياتك=وريحة عطورك بالورق والسواليف
وحرفٍ على السلسال هو وامنياتك=وعلى جدار البيت ذكرى المواليف
ودعوة زواجي وردها يوم جاتك= بيت القصيد ودمعتك بالمظاريف
واني عليك اليوم حسبت خواتك=قول وفعل ماهو كلام وتخاريف
والموت لامرت عليه رجاتك=تحرق بقايا مابقى بالمهاديف
تقول سمي (فلان) هذي وصاتك=واقول من مثلك يجي بالتواصيف
لاوعذاب القلب من ذكرياتك=صارت على قلبي همومٍ مراديف

البارحه ياكبر همي=النوم عفته ولاجاني
والدمع مشيته بكمي=عن ابعد الناس والداني
من غربةٍ نشفت دمي=مالي بها من صدر حاني
وجدي على ديره اتضمي=امي وابويه وحياني
يوم ارتمي في حضن امي=انسى همومي وتنساني
ماهي مثل ديرة الغمي=ماروق لو جوها زاني

جيتك ندم جيت الخطا اعترف فيه=ان كان يرضيك الندم واعترافي
جيتك وانا احمل قلبٍ البعد كاويه=يناشدك باسم الغلا لاتجافي
اجبر بخاطر من يودك وتغليه=يستسمحك قلبي وينخاك قافي
اشره وعاتبني ولا اقولك ليه=اجرح وعذبني ولا اقول كافي
حتى العذاب الي يجي منك راضيه=جرحك حلا شهدٍ على القلب صافي
جفت عروق القلب من غبت ساقيه=ورده ومن عقبك ذبحها الجفافي
ارجع عساني مانحرم منك ياهيه=ياواحدٍ عن باقي الخلق نافي
ماهو صحيح الي تغلا نخليه=واكبر دليل القلب عيا يعافي
لان الحبيب يزيد قدره تغليه=ويزداد شوقك كل ماقال ((مافي))

تكفى حبيبي حس بالشوق فيني=وارحم محبٍ دايم الدوم شاريك
تكفى على شاني تحس بحنيني=ارجوك قدر من يعزك ويغليك
حاول قدر ماتقدره تحتويني=حقق منايه لجل احقق امانيك
ابيك اقرب من دموعي لعيني=ابي اكحل دايمٍ ناظري فيك
واذا ظروفك يمنعنك تجيني=معذور لو قلت عليه خطاويك
لكن طلبتك راحتي فاثنتيني=ان كان تبغاني رفيقة مماشيك
صوتك ابد لاتقطعه ياضنيني=خله يغذي روحي الي تهاويك
ولا على الجوال يانور عيني=لو بالرسايل تنتعش روح غاليك
واذا حرمت القلب هالحاجتيني=وطولت بغيابك وعذبت راجيك
تكفى اعترف لي قولي ماتبيني =واني انا غلطه بصفحات ماضيك

من ذابت إيدي في راحات يدينك=عرفت طعم الحياه ولذ عيشتها
واني من اليوم صعب اعيش من دونك=يانور دنيا غموض ويا سعادتها

ياقلبي اسمع قبل لارحل واخليك=وافارقك غصبٍ علي يالحنوني
بودعك ربي وعلى نفسك اوصيك=احرص عليها وانتبه ياعيوني
ولاتحزنك فرقاي والموت يبكيك=ولا تكدر لاسمعت ادفنوني
يكفي عطاك وصبرك لاقل معطيك=ايام عن كل العمر عوضوني
واستسمحك لو مر به يوم مشقيك=ابي تحللني وتسمح ضنوني

العيد عندي يامها صار عيدين=مدري على ايا عيد بتعايدني
انتي على عيد الضحيه تهنين!=وانا معيد قبلها صدقيني!!
عيدي بخمس ايام من قبل الاثنين=واليوم سابعها مع المسلميني
ياليت عيدي يعاد في كل شهرين=ولا مثل عيد السنه مرتيني

اغيب وتشغلني ظروف الليالي=وارد مشتاقه لصفحات ويلان
ودي اعانق كل حرف ومقالي=واطير برجائه على كل الاركان
ووصل إلى ركني واهيم بخيالي=مره جنون ومره افراح واحزان
ولاضاق صدري فوق قدر احتمالي=له اتصفح واشتكي جور الازمان
ماقول ينقدني ولا له سؤالي؟=لاجيت ناشبني ولاغبت زعلان!!

لاتطري البعد طاري البعد يخنقني=ويضيق صدري ليا منك لي اطريته
افهم شعوري وعنك لاتبعدني=مادام قلبي مع احساسي لك اهديته
ولاتشك بغلاي ومنك قربني=الشك يهدم غلاك وينخرب بيته
يا اغلا البشر كان اهمك لاتعذبني=يكفي عذابٍ قبل للقاك عانيته

يانوف انا وش حيلتي باقرب الناس=شخصٍ اعده بالشدايد رفيقي
اللي طعني بالظهر والرحم داس=دم(ن) جمعنا له يحاول يرقي
كنت احسب انه مربحي وقت الافلاس=اثره غدا اول عثرةٍ في طريقي
ياحيف بايعني على كل بلاس=صار السبب في هم قلبي وضيقي
ماطعت به هرج العواذل والانجاس=واثق وله بالقلب حبلٍ وثيقي
كان الصديق اللي مثل قرب الانفاس=يومٍ قدره بالضماير عميقي
واليوم تجمعنا حروفٍ بكراس=لاهو عدولي ولاهو صديقي
(قال السديري قبلنا للهدم ساس=بيتٍ ظلاله مايظل الرفيقي)

اجرح فداك القلب..ياقلب مغليك=قبلك زماني.. جرح القلب وادماه
اول "غلا عمري" وفرحه مسميك=واليوم سميتك "فرح مر ممداه"

خلك معي متصل لو ماتحاكيني=بالقائمه لونك "الاخضر" يريحني
اليا متى يالغلا وانت مجافيني=لاقايل ابعد..ولا بالوصل تفرحني
كانك تبي البعد وقلبك مايدانيني=الصبر لا الله ولاتحكي وتجرحني
خلك معي متصل واقول باغيني=مشغول بكره يجي يمي يصافحني!

تغيرت ما انت اللي عرفته تغيرت=مدري وش اللي عليه غير احوالك
من شفتني مغليك عني تكبرت=احاول اجيك وانت تشح بوصالك
ماهو جفا لو غبت عنك وتصبرت=بعطيك فرصه تحدد وش هي امآلك
كان الفراق بخاطرك وله تخيرت=والله لا اعز النفس لو كنت هالك!

تعبت يمه..وماتت كل احلامي=ياحسرتي من شقا ايامي وخيبتها
ضميني يمه..ابسترجع دفا ايامي=ذكرى الطفوله برائتها ولذتها
يومي صغيره واقول العمر قدامي..!!=طفله ولاهمها ياغير لعبتها
من قبل لاحط لاشيله ولا اللثامي=ولاذقت حر الليالي مع مرارتها
كبرت يمه..وكبرت كل ألآمي=ودعت حلم الطفوله مع حلاوتها

سلامتك يابوي من كل عله=الحمد لله خالقي يوم عافاك
ياعل يومي قبل يومك ياعله=وياعلني مفقدك ولاسمع بفرقاك
نورت بيتك ياعموده وظله=ياتاج راسي جعلني من فداياك
رحبك المسجد مع الحي كله=صوت المؤذن بشر الناس بشفاك
وديوانك اللي يحتري منك طله=اشتاقت السبحه ومشتاق مركاك
وعلى دلال العز كلن توله=على النبا الطيب وضحكة محياك
سلامتك ياراعي الطيب كله= ياللي ينومسني مع النا س طرياك

أن كان يغريك الشعر ياغلايه=انا عليك يحدني طيب الاخلاق
وكانك من الدنيا تدور رضايه=انا وهبت العمر لرضاك ينساق
معك ابتدا عمري وقصة هوايه=وتبدلت عتم الليالي بالاشرق
يانادرن بالوصف يا اجمل حكايه=هديتي من خالق الكون رزاق
طلبت ربي يستجيب لدعايه=الله لا يكتب لنا بعد وفراق

صبر وشقا وهموم وقلت توافيق=من خلقتي ماشفت غير السوادي
يارب تفتح لي دروبٍ مغاليق=وانزع من ايامي لباس الحدادي

ان كان مالك يالغلا بالوصل نفس=على الاقل ارسل وقول انك بخير
حالي دمار وخاطري منعفس عفس=في داخلي شيٍ يبي منك تبرير

للبيت قصه ولدروبه حكايه=حتى ترابه جزء من هالسواليف
سقفه وبيبانه وكسرة مرايه=اغليه لو كلن هجر ركنه وعيف
بشته مواعيد الغلا والعبايه=والبرد واسرار الدفا والمواليف
يابيت لو انك قديم البنايه=اجمل من قصور السلاطين بجنيف
جوك شفاي وشوفتك هي منايه=اللذ من جو الهدا لاقبل الصيف
لك موقع متمركزٍ في حشايه=قصة غلا ماهي علومٍ وتزييف
يابيت ودعتك هواه وهوايه =قل لاسمعت بشي ولاشي لي شيف

باسم الغدر تنال اعلى الشهادات=واصبحت متخصص بفن الخيانه
صار الكذب عندك مهاره وعادات=والصدق ماله في حياتك مكانه
غدار مالك فالمحبه ديانات=خنت العهد خنت الوعد والامانه
الحب عندك تسليه مع هوايات=حتى يقولو عنك فارس زمانه
واليوم متخصص فكل المجالات=كذاب ومخادع ومالك ديانه
نذرٍ علي لاسقيك كاس المرارت=واذوقك طعم القهر والاهانه

لو خسارة حب قلبٍ لك اهديت=كنت احسب انك لي حبيبٍ نصوحي
وبساع ضاع الحب وعني تخليت=عقب الغلا والحب تطلب نزوحي
انا ادري انك مني اليوم مليت=ويلك من الله ليه سببت نوحي
يومك عرفت اني بحبك تبليت=تركتني تقول يابنت روحي
صحيح حبيتك وبالفعل بك ميت=بس الكرامه عندي اغلى طموحي
ببعد ولو فالبعد حرٍ وتنهيت=ببعد لو ان البعد ناره تفوحي
من خلقتي مذكر لشخصٍ ترجيت=اطا على قلبي واخفي جروحي
ولا بعد اذكر لحين تشكيت=اخفي سبب حزني وابين فروحي

........جيتك حنين وحب يالغالي=حب غزا القلب واستولى على افكاري
جيتك وله جيت شوفك اكبر آمالي=شوفك هدف رحلتي هو دافع اسفاري
جيتك انا مسافره والشوق له صالي=شوقٍ فضحني وبيح كل اسراري
ماغاب طيفك ولو لحظه عن البالي= اليا تذكرت طيفك زاد الاصراري
انكرة حبك وقلت القلب لك خالي=لا الصبر ينفع ولا ينفعني انكاري
جيت اعترف لك بحبٍ ياصفه حالي=فيه اعترف لك وترجمته على اشعاري

ان كنت صادق يالغلا في هوايه=لا..لاتعذبني وتذبح خوفقي
كانك تبيني..لاتسبب شقايه=لاتحرق اعصابي وتضمي عروقي
في غيبتك موت ووداع ونهايه=وعقلي يجيه من التفاكير عوقي
خلك معي صبح ومسى ياهنايه=لجل املك الدنيا وجوي يروقي

يادمعتي عن عديل الروح عزيني=وانا بعزيك ياقلبي على فراقه
ياقلب يامانهيتك لا تعنيني=مالك على الحب ودروب الهوى طاقه
شفت آخرت دربك اللي له موديني=اللي تعنيت لجله احكم اغلاقه

ما اعاتبك لجل اتغلى وازعلـكْ. .ولاقصدت الهجر يانـور عينـي
خوفي مع الأيام تخطي واجاملك. .وتقسى قلوب(ن)فرقتها السنينـي
أنا حبيبك لـو قسيـت بتعاملـك. .وشلون ابيعـك يابعـد والدينـي
والله ماكنت أحلم اني أحصلـك. .ولاكنت أصدق يملك انك يدينـي
ادمح لي الزلات وأنـا اتحملـك. .خلك معي لاضاق صدري عويني
ماقوى تخليني ولا اقوى تجاهلك. .عليك أغارمن الهـوى ياضنينـي
وأغار حتى من كتابـة أناملـك. .واحسد عين(ن)شافتك غير عيني
حبي لك أكبر من مساحة تخيلك. .ومالك بقلبـي ياحياتـي وزينـي
لاتحرم المشتاق لـذة تواصلـك. .ادري مثل ما ابيك أنـك تبينـي
خل المعاند عنك واترك تزعلـك. .قرب يمينك حطها فـي يمينـي

اخطيت ومنك ارجو العذر والسموحه=كلي ندم والذنب يطلبك غفران
جيتك بقلبن ضايقن من جروحه=جيتك ذليل ومنكسر لك وذبلان
احمل معي قلبن تهاوت صروحه=شاف القهر من غيبتك عنه ندمان
في غيبتك استوطن الهم روحه=يصبح عليه الصبح ضايق وسهران
مد الوصل لاتصير يدك شحوحه=يكفي جفا يكفي غيابن وهجران