سلام والتقدير بالصدر محفوظ = من شاعرٍ قضى حياته جمايل
شاعر ولاخلا من العز مركوض = قاس المسافه كلها،، بالدلايل
من دور غانم ,,لاشمخ ينهض نهوض = الين دور المعمعه والفشايل
مغّذى من العزه ولايقبل الخوض = إلا بزومات (الطنا) والأصايل
اقولها في هيبة المزن والنوض = وايل وياكبر الفخر عند وايل
يوم انها واجب ووقفات وفروض = (ملوك الجزيرة) عدّلو كل مايل
بالسيف خلو (داعي الخوف) مرفوض = وبالرمح خلو (واجد الظلم) زايل
عدوهم بالكون طايح ومنقوض = وصغيرهم بالسيف صايل وجايل
ومن ينتخي فيهم من الناس..محظوظ = بني (عنّاز) مطوعة كل عايل
فكاكة الأذواد..كسارة الحوض = بركابهم طالوا على كل طايل
هداتهم تشفي غليلٍ وممروض = وبطيبهم تشهد جميع القبايل
قلته،، وتاريخي على الكل معروض = يشهد (جبل سنجار) و (جبال حايل)
شمر هل الردات والقول مفروض = اهل الصدارة للفخر والأوايل

ليه الخطأ .. ليه التجاهـل والإهمـال = ليه التمادي والخطأ .. ويش أبـي بـه
الأولـه: تشـرى وتنبـاع بـريـال = راحت ولاجت من وراهـا مصيبـه
والثانيه: ماعاد تطـري علـى البـال = ولا تسجّل فـي سجـل ( المعيبـه )
والثالثـه: والرابعـه ذرب الأعمـال = أخفى رداها .. من شموخه.. وطيبـه
والخامسه والسادسه: قال ..وش قـال = بالسابعه: ماجبـت.. بالـك تجيبـه
والسابعه : تكرّرت نفـس الأحـوال = قـال أتحمّلهـا ..ولاهـي غريـبـه
والثامنـه: هـم ومغثـه وغـربـال = ولا دفعنـا مـن وراهـا ضريـبـه
والتاسعه: قال إنت إبن خال ..يا خال = والله يعلـم مـن تجـي فـي نصيبـه
والعاشره: صارت بدون أيّة إشكـال = ماغير هجس وشك.. والشك.. ريبـه
أنا أشهد إنك يابن مجـلاد .. رجّـال = مواقفك وقـت اللـوازم ..عجيبـه
بك حاجة السائل.. وبك طيب الأفعال = وبك نصرة المظيوم .. طيب وغصيبـه
يجبرك تاريخـن مشـرّف .. ومتعـال = إسمك شرف .. يا حظ .. من يندعيبه
بندر.. وبندر.. ما تكفيّـه الاقـوال = وإن ضقت... وانا شمري.. أعتزيبـه

بأسم شيخٍ رحب بقـدر ومـوده = بالضيوف وبالمعارف والقرابـه
في فرح منصور فرحه مستجده = وشوفكم زاد الفرح طيب ورحابه
مرحبا هي مبتدا القاف ومشـده = قالها وقال انـت قلهـا بالنيابـه
افتخر وأغلى المشاعر مستعـده = للوفاء اللي به مشاعرنـا تشابـه
للحضور العود الازرق فاح نـده = عند شيخٍ منـزل العليـا رقابـه
المراجل ورث ابوه وورث جده = يرفع الراس العزيـز ويعتزابـه
من شيوخٍ تنطح الجمع وتصـده = روس قومٍ صيتهم كـلاً درابـه
من عصور اهل الركايب والأشده = والتحدي والتصـدي والمجابـه
شجرةٍ حاضـر وفاهـا تستمـده = من زمانٍ طيب ماضيهـا وفابـه
بيرق اهل المجد يوم الوقت شده = عالياً واليوم حاضرهـا احتفابـه
الضويهر يـوم كـلاً دون حـده = مجدهم مابـه جـدال ولاغرابـه
منهم سليمان ضد اللـي يضـده = اخو نمشه عز مضهـوداً لجابـه
ومنهم محمد تمـد الجـزل يـده = من سخاه يزهب الطرقي زهابـه
ومنهم اللي قال قول وصار قـده = قول فارس عند فريـس وثنابـه
من يمين اللي له الفنجـال مـده = ركده والكيف ذوقـه ماسخابـه
ذاك علوش الضويهر يـوم رده = في محل الضيغمي برهن جوابه
لو بغينا نحصي الفعـل ونعـده = ماوصلنا وصف حرفيـن بكتابـه
ومثل ماقلت اثني القاف لمشـده = وكل بيتٍ من قصيـدي ياهلابـه
مدح ابوفهد رضـى قلبـي ووده = شيخنا اللي له مقام ولـه مهابـه
حاضره بالطيب بين امسه وغـده = فخرنا وحمود تفخر فيـه لابـه
بالمكارم جـود ماجـوده يمـده = الكرم هتان جود وهـو سحابـه
يبني الصـرح المشيـد مايهـده = صان موروث الاوائل واعتنابـه
منهلٍ ماغار صافـي جـم عـده = كـا مـازادت وروده زاد مابـه
مايتخلـى بالظـروف المستبـده = ماقفه يشفي غليل اللـي هقابـه
ما ل قولة نعم عن شرواه صـده = كلمةٍ تشريفهـا حضـرة جنابـه
وان بدت طرق المراجل مجرهده = له ربوعاً فعلهم يلقـى الذرابـه
والحرار اللـي تهقويـه وتسـده = كـل واحـد باللـوازم ينتخابـه
قلتهـا واقولهـا والحـق اعـده = ومن يقول الحق عند الله ثوابـه
كل طيب نعتـزي فيـه ونـوده = والردي لاهو حزام ولاعصابـه
لو قدر يلـد قـول الحـق لـده = ولو ملك رزق الخلايق صك بابه
والختام اغلى المشاعر مستعـده = للوفاء اللي به مشاعرنـا تشابـه

سـلام يارمـز الرجـوله والافعال = سـلام ياعـــزالـرفيق وعضــيده
سـلام ياحـر(ن) لـه الطيب منزال = ياكاسب(ن)كل الصفات الحميده
سـلام ياللـي للصعـيبات حـــــلاَل = سـلام تعـجـز عن وصـوفه قصـيده
سـلام لو يرسا على عالي الجـال = تزحزحت كــل الصخـور العنـيده
لـبو مشاري طيب الصيت والـفـال = عزالله انــه مايــهاب الشـديـده
مـحمد طـنا للوقت الاقشر أليا مال = رجـل المواقف والمواقف عديـده
أن كـان للفزعـات تاريـخ وارجــال = انشـهـد انــه يعتــبرها عقــيده
مـن نسل وايـل للمناعــير مدهـال = من افعالهم تشيب روس(ن) عـنـيده
جيته وانا شايل معي ضيقة البال = مـاشفت غيره بالمـواقف ولــيده
وقفـلها الحــر الـنداوي ولا زال = لـه وقفت(ن) بالطـيب دايم سديـده
والـطايله لـو دونـهـا ارجـال واجـبال = يرقـالها لـو المسافـه بعــيده
مشكـور يالـوافي على كل لاحـوال = وعـسى سنينك يابو مشاري مـديده

هلا هلا وامتلا الخفاق وفروعه=ترحيب بالذيب والاشواق فوارة
( تيماء ) تهلي وتوقد حفلة شموع=هوالليل مثل النهار وزاد بانواره
يا مرحبا عد صبح بان بطلوعه=وعداد كوكب بدا ونجوم سيارة
وعداد رمل ووبل صب في قوعه=وعداد عشبه مع أشجاره ونواره
باللي نصاني قصيده واذهب الروعه=عقد من اللول مجلوب بمحاره
سبايك من بنات الفكر مصنوعة=من بطن مهد الذهب جابوه تجاره
امواج لا هاج شاطيها حسب طوعه=ما يقدر السير فيها كل بحارة
( فواز ) لا هاز صيد الشعر بطلوعه=مخلاب كفه تقول سيوف بتارة
يهوي ويدلي وياخذ منه مطموعه=والخرب حول وعاقه ضرب شنكاره
فواز يا حافظ التاريخ بضلوعه=وياخالط الدر والمرجان باشعاره
يا حي قافك عسى الجيات بتبوعه=لحيث نشفق على مثلك ومسياره
خوة رجال الوفا يازين طالوعه=وخوة هلوس الردا ياشين مصداره
الطيب اشفق على لاماه واجوعه=والعفن مسهوج لو هو باول الحارة
ارفع مقامي عن المسهوج واربوعه=واعز نفسي عن الهلباج وافكاره
ورفقتك عندي شرف واروع من الروعة=ولرفقة الناس عندي فن واداره
بناية الصدق عندي غير مصدوعه=اتعب على ساسها واطول جداره
واذا نواها خبيث الساس بجموعه=يبطي عظم ما وصل من عالي اسواره
وسلعة صداقه صديقي غير مبيوعه=لو زود الطامع السوام باسعاره
في خزنة من ( حديد الترك ) مصنوعة=وفراشها من حرير ودونها ستارة
وبعض العرب تنتهي رفقته باسبوعه=زبدة وذابت وملح طاح في ناره
وشكواك بالقلب قبل الاذن مسموعه=شبت بوسط الضماير نار كراره
ان يسر الله لتشرب حلو قرطوعه=( هداج ) يروي ظما الظامي عن امراره
ابشر بعز يهز الخصم بسنوعه=وش الطلب ؟ قل , وانا ملزوم باحضاره
اضرب بكف على النوماس باتوعه=واجلب لك الروح ما راعيت لآثاره
المال والجاه لك مرهون وفزوعه=والقوة اللي تخض الخصم في داره
( عيال وايل ) سنايد من هم ربوعه=اطرفهم اللي رقا في طيبه القاره
مير اعتبر حاجتك يالقرم مشلوعه=لو هي بوسط البحر لاجيب بحاره
وانا لو ازرع من الابيات مشروعه=ما جيت معشار معشارك ومعشاره
وهرج بليا فعل ما بان منفوعه=سحاب صيف سرا ما هلت امطاره
وان كنت غلطان فالغلطات مرجوعه=كم رامي للهدف ما صوب الشارة