التوبـه \ لسعد علوش

[سعوط المجانين]

من كل حرف , وكل شهوة صبابه = اســتغفر الله وأتعــوذ من ابليـس

أعوذ باللي آوى عبد وسرا به = لاجي نهار الحشر خلف امرئ القيس

يارب , يارب الكرم والمهــابه = يالي لك أعلام الأوادم مناكـــــــيس

جردني امن النابـيه والسـبابه = ولبسني من دروع هديك متاريــــس

تعبت من مسك القلم والكتابه = والشعر وفتن النســــــا والأباليس

والمدح في عزوة وشـيخ و قرابه = واللاء, لدعوات الرضيين والليـــس

والحب, وماحوله,وماله , ومابه = والدمع لاهـبت عـلـي النســــانيس

والشوق وغفال العقل وانغلابه = والليل وخطط الدها ... والجواسـيس

والشهرة وحكي العرب واللبابه = وزملوق شف ماتعسه عواســيس

وحصر اسمي فشاعر فساحة غرابه = شعّارها فيهم رخوم وملاحيس

وانا لعطاش الأودام ســــــحابه = ومن خلقتي ماقد وطيت الدنافيس

تاكي على ارث الاسم بالنيابه = واقطف خلاصة ماغرسوه الغواريس

احسبني فايز بالرضا والذرابه = واثري مثل من يحصر النور في كيس

اقفي من الله والأمل والرضا به = واروح أدور من ورا ابليس أحاسيس

قلبي لعــــزاف الاوادم ربــابه = وراسي لخطوات الشــطانه دواعيس

تقودني نفسي والا اشعر ولا آبه = مالت عليها عاصــيات الهـــواجيس

من عنده ان كل الشـــعور يتشابه = روس مع اللي في الدحـادر مراويــس

الاثم ما حاكه خفوق وخفا به = والخير ماشاعته روس النوامــــــــيس

كم شي صار وصار مايندرا به = وكم نومة ماكدرتها كوابيـــــــــــس

ترى ما أحد له في رقبتي طلابه = بس الصــــراحه من شيم الفواعيـــــس

والرجل اذا مايعتبر في شبـابه = يعيب قبل يشيب ويشيب ويخـــيس

ياراجي ارجي اللي ماينصك بابه = لاترجي الوهبات من هـيس ابن هيـس

اســـــتغفر الله واتتقى من عـــذابه = اللي فرقـني عن حـياة المتاعـــــيس

من قبل لا اعرف الهدى واعنا به = أنا وهمي والحزن Face to Face

والحين لله .. الفضل والانابه = متعافي .. ويمشي على زندي التيس

هادي .. يشوشني طزيز الذبابه = لاعد لايام الغبيه ولا اقــــــــيس

شريت عقلي في سؤال واجابه = أنا أعبد الله ... والا أعبد الوساويس ؟

لذة خفوقي وانجلاية ضبابه = سجدات ليل ٍ ظالمينه مناعـــــــــيس

فـ اجواء مكه والحــرم والرحابه = لايابعد رومـا ولـندن وباريــــــــــس

هذي ديار المصطفى والصـحابه = وهذيك دار ابلــيس وعوّيل ابليــــس .

[البيداء]

ترى ما أحد له فـي رقبتـي طلابـه \\\ بس الصراحه مـن شيـم الفواعيـس

والرجـل اذا مايعتبـر فـي شبابـه \\\يعيب قبل يشيـب ويشيـب ويخيـس




:more19: * * * * * * * * * * * * :more19: * * * * * * * ** * * * * * * * :more19:


مرحباً بالأخ سعوط ،، ومرحباً بهذا الإختيار ،، لسعد بن علوش ،،



الشاعر الجزل ،، الذي فاجأنا بقصيدته هذه قبل أعوام ،، واعتقدنا باعتزاله الشعر ،، فمعاني القصيدة واضحة الدلالة على توبة



من الشعر وأهله ،، ولكنه أظهر بأنها موضوع فكر فيه وتراجع عنه ....







أخي سعوط ،،، شكراً لهذا الأختيار الجميل ،، فسلمت يمينك على هذا النقل ،، المميز والفريد ....





تحياتي .. البــيــــــداء :more19:

[سعوط المجانين]

الشكر موصول لكي اختي البيداء على المرور الرائع

تحياتي

[فايز البذيلي]

صـــــــــح اختيااااااااااااارك


وصح فكرك



وصح الله لسان سعد



قصيده في روحانية جميله


تقديري

[سعوط المجانين]

صح بدنك ولاهنت وشاكر لك الكلام الجميل الذي ينم عن ذوق رفيع

مودتي وتقديري

[ابوعبدالله الغريب]

ياليت سعدعلوووووووووووووووووووش ماقال ذي القصيده



لأنهااعلان توبه



وحاله الآن


الله المستعان





نسأل الله الثبات