يقولون مال العبد ندن عن المقسووم

[معيض بن عريفج]

قصيده رائعه للشاعر راجح الشامري العجمي


يقولون ماللعبد بد عن المقسوم = وأنا أقول صح ويقنع العبد مقسومه
عسى الله يعين اللي توافد عليه إهموم = هموم(ن) تخلي طبلة الراس منجومه
ترى والله انه مايكدر عليك النوم = سوى كلمة(ن) من بعض الاصحاب مسمومه
إليا جت من الغالين وإلا الرخوم رخوم = ولا أمحق من الغالي إليا شانت علومه
ضعاف الروابع تبتلش والقروم تشوم = ولاهيب لا شامت من الشين مليومه
ولا أزين من القاع الخلا والوجيه سلوم = ولا رفقة(ن) مع طول الايام ملغومه
ولا ألذ من عشرة شريف من أقصى القوم = يبادلك فعل الطيب معناه وسلومه
ولا شفت في جو الصداقه غبش وغيوم = عطيت الدروب اللي مع الارض مرسومه
ولا مثل عز النفس لو مامعك مطعوم = وعن أهل الشماته خل الاسرار مكتومه
معي لو سمحت شوي عقب عداك اللوم = أبعطيك عن بعض الرياجيل معلومه
ترى اللاش لو وقف معك في حياته يوم = تشوف الردى متبين فيه من يومه
وأنا أقول لو إن في وجيه الرخوم وسوم = عرفنا نميز قيمة النذل بوسومه
علشان نجلس مع رجال الوفاء ونقوم = ونبعد من اللي عند الاجواد مذمومه
وأنا أسمع مع أهل التجربة في الحياة علوم = بعضها صحيح وبعض الاخبار موهومه
يقولون وكر الحر ما يعتليه البوم = وأنا شوف عيني وكر حر(ن) تحت بومه

[صالح الأسود الجعفري]

معيض بن عريفج

صح السانك ولسان شاعرها
وتسلم يمينك ع الانتقاء المميز
دمت بخير

[هيـاا العـازمـي]

.
.
.

شاعرنا معيض بن عريفج

عز الله انك طيّب وما جبت إلا الطيّب :)

لله درك على هذا الانتقاء الجزل المتعمق في الحكمة

راجح الشامري العجمي

يصح لسانك وبووحك وفكرك

ولاعدمناكم

هيــــااااا

[محمد المالكي]

ولا مــثـــل عـــــز الـنــفــس لـــــو مــامــعــك مــطــعــوم ** وعــــن أهــــل الـشـمـاتـه خـــــل الاســـــرار مـكـتـومــه


صح لسان شآعرها وتسلم يمين ناقلها ... ابداع في كلاهم : انتقاء وبدع .
تحياتي المعطره .

[سالم العنزي]

صح لسان الشاعر راجح عزالله انه كفى ووفي

ولاغريب ان تكون ذائقة شاعر جزل مثلك يامعيض الجزاله

شكرا لك