سجن الشعراء

[سعد النفج]

((سجن الشعراء))



سجن ليس كأي سجن ..
اعتبروه سجنآ ثقافيآ...


سجن يجبرك على المكووث والمشاركة ,,
ولا تخرج منه الا بعد ... إنهاء ما عليك من عقوبة ..


وهذا بدوره يخولك..
بإدخال أي عضو أو أي مشرف او اي إداري لهذا السجن بشرط ان يكون شاعر.





( الشروط )



1_ يتم سجن احد الشعراء في سجن الشعراء .
2_ يبقى بالسجن حتى يقضي مدة عقوبته التي تنتهي بوضعه أبيات من الشعر كفاله .
3_ بعد خروجه يقوم بوضع اسم شاعر آخر ليكون سجين جديد للشعر .
4_ يشترط ان لا تزيد الابيات المطروحه عن أربع أبيات .
5_ يشترط ان تكون الأبيات من كتابة الشاعر الخاصه .



سيكون أول سجين معنا
الشاعر : محمد دعسان

و سـ يقوم بوضع الأبيات ثم يختار شاعر آخر
ليكون السجين الثاني

و هكذا

اتمنى التفاعل من الشعراء و ربما تكون هذا الأبيات مولد قصيدة
مميزة ..
بانتظار شعرائنا ..

[محمد دعسان]

اولاً شكراً على هذه الفكره الرائعه انعشتنا يارجل
له له ياابوشايش
انتظرني
ساجنك ساجنك
زنقه زنقه ثوره ثوره
الى الامام

[محمد دعسان]

ال عب باالحرف وحتكم لك باالوزان
-----------------ونا على كيفي صنعت المساحه
ما شلت هم ولاتظايقت بحزان
----------------وواجه الصعبات بصبر وصراحه
وعلم الردا والله مبغاه لوزان
-----------------وراع الوفا المه وضمد جراحه
الطيب له ميزان وللغير ميزان
------------------ونا خوي الطيب ونا سلاحه

[محمد دعسان]

تعال يا مشرفنا العزيز
سعد النفج ادخل السجن ههههه
عارف تبي تطلع بسرعه ماينخاف عليك
ما شا الله تبارك الله

[سعد النفج]

حياك الله يا بو مرام ..
صح لسانك و ما هو غريب الابداع عليك ..
بس انت وش تبي من حلقي هههههههه

الله يعين على السجن بس لا تنساني من العيشه يا بو مرام لين اطلع ..

لي عودة

[سعد النفج]

صدفه كذا من دون موعد لقيته
صدفه ثمينه عن ثمانين ميعاد


غاب و على موعد لقاه احتريته
عامين و اعلن دمع الاحباب ميلاد


لا ما فقدته و الله اني بكيته
و جو الحروف بغيبته حزن و حداد


انساه لا و الله انا ما نسيته
ما نساه لو جسمي بلاروح ينقاد



السجين القادم

الشاعر : حمد الضوي ..
الله يعينك على السجن يا حمد ..

[محمد دعسان]

هلا هلا بك ياحمد جرب السجن
انه سجن ممتع تلقى جبنه وحلاوه فوق الشباك داسهن عن سعد هههه

[سعد النفج]

افااا يا بو مرام و انا اشم ريحة الجبن بس ما أدري وين مكانه ..
ننتظر حمد ..
و لا زال حمد خلف قضبان السجن الشعري ..
.

[محمد دعسان]

زياره لخوي حمد
وشلونك عساك بخير طمني على صحتك
يوجد في السجن هاتف الثريا تلقاه تحت الجبن والحلاوه
في حاله الطواري اتصل على اي رقم مخزن تجدني منحاش
اومقبوض علي من قبل سعد النفج العدو الاول
ونا اقوم بثوره عارمه ظد ابوشايش وهذي معلومات سريه
لايعلها الا عداء هجوم شرس

[حمد الضوّي]

اقتباس:
المشاركة الأصلية كتبت بواسطة سعد النفج http://www.weelan.com/vb/mecano/buttons/viewpost.gif (http://www.weelan.com/vb/showthread.php?p=393915#post393915)
صدفه كذا من دون موعد لقيته
صدفه ثمينه عن ثمانين ميعاد


غاب و على موعد لقاه احتريته
عامين و اعلن دمع الاحباب ميلاد


لا ما فقدته و الله اني بكيته
و جو الحروف بغيبته حزن و حداد


انساه لا و الله انا ما نسيته
ما نساه لو جسمي بلاروح ينقاد



السجين القادم

الشاعر : حمد الضوي ..
الله يعينك على السجن يا حمد ..



هلابك أخوي / سعد النفج

شكرا ً لك على هذه الفكره المشوقه
وصح لسانك على تلك الأبيات الأكثر من رائعه
والله يعين اللي بحياته مادخل سجن أكيد وضعه بيكون مختلف

المعذره عن التأخير


لي عوده عن قرب بإذن الله تعالى

[حمد الضوّي]

اقتباس:
المشاركة الأصلية كتبت بواسطة محمد دعسان http://www.weelan.com/vb/mecano/buttons/viewpost.gif (http://www.weelan.com/vb/showthread.php?p=393916#post393916)
هلا هلا بك ياحمد جرب السجن
انه سجن ممتع تلقى جبنه وحلاوه فوق الشباك داسهن عن سعد هههه



محمد دعسان

حياك الباري يالغالي

أعذرني مادريت عن سجنك وإلا كان زرتك وجبت لك
رغيفات يحبهن قلبك ( على الصاج ) والنار من خشب النفود
لكن ليش حطيت الحلاوه والجبن على الشباك الله يهداك وأنا قصيّر دخلت بعدك
ولاقدرت ألحقهن أكل خبز ناشف هههههههههههه الله يسامح سعد النفج



تحايا

[حمد الضوّي]

اقتباس:
المشاركة الأصلية كتبت بواسطة محمد دعسان http://www.weelan.com/vb/mecano/buttons/viewpost.gif (http://www.weelan.com/vb/showthread.php?p=393921#post393921)
زياره لخوي حمد
وشلونك عساك بخير طمني على صحتك
يوجد في السجن هاتف الثريا تلقاه تحت الجبن والحلاوه
في حاله الطواري اتصل على اي رقم مخزن تجدني منحاش
اومقبوض علي من قبل سعد النفج العدو الاول
ونا اقوم بثوره عارمه ظد ابوشايش وهذي معلومات سريه
لايعلها الا عداء هجوم شرس



هلابك يابو دعسان

اشكرك على هذه الزياره وابشرك انا بخير وعافيه
والمشكله ازريت ألحق جوال الثريا لأنني مثل ماقلت لك قزم
والسجان سعد النفج مستحيل يجيب لي سلم حتى الفراش يمنعه عني يخاف أنني أطلع عليه
وأوصل للي فوق الدريشه ههههههههههه


تحايا

[سعد النفج]

هههههههههه يا هلا بك يا حمد ..
و الله ما ادري وش هالمصفوط من ابو مرام ..
رافعهن على الدريشه و هو يدري انك ما تلحق ..
لكن الله يعينك لا جوال و لا أكل .. ما عندك غير هالخبيزات ..
و مقبل عليك الشتاء بس هات البيوت اللي عندك قبل تهب و تبلش ..
.
حياك يا حمد و معك الاستمتاع بإذن الله ..
ننتظرك و ننتظر السجين القادم ..

[محمد دعسان]

ههههههههههههه
ههههههههااااي
الله يسعدك
يابعد راسي

[حمد الضوّي]

هذه الأبيات عسى أن تشفع لي وأخرج من السجن
ولو أنني كتبتها على عجل العذر والسموحه





يا محمد الدعسان نفداك وين أنت=إفزع لنا يوم أنت للطيب حايش
سجني بغرفه كل جدرانها سمنت=ومقفلات ابوابها والدرايش
ترى لو عندي علم يوم إنك إسجنت=زرتك ولطلوعك مسوّي رشايش
ويابن نفج تعمل كذا ليه لاهنت=سويتها ياصاحبي يابن شايش







الشاعر / مطنوخ الويلان ( مشهور الرشدان ) يجهز نفسه لدخول أحلى سجن
حلاوه وجبن يعني فله لكن عسى مايجي نظام يمنع الزياره



تحايا للجميع

[محمد دعسان]

اقول بيض الله وجهك يا اخوي حمد
مشهور الله يحييك ادخل حمد اصدر
حكمه ههههههههه مابها طب

[سعد النفج]

الله الله
صح لسانك يا حمد .. و ما بعد هـ الابيات سجن ..
تم الافراج عنك .. و يا مشهوووور دخول للسجن حتى تجيب الكفاله و هي ابيات من الشعر ..
بانتظار مشهور ..
.

[مشهور الرشدان]

بسم الله الرحمن الرحيم
اللهم صل على محمد وعلى آله وصحبه أجمعين
السلام عليكم ورحمة الله وبركاته
اشكرك جزيل الشكر استاذي سعد على هذه الفكره الرائعه
وصح لسانكم جميعاً شعراء مبدعين وان شاء الله هذه الابيات تشفع لنا
ونطلع من السجن


اول اقـول انـك علـى الجـرح تشفيـه =والحين ماتشفي وانا جروحي عطـاب
اهـد فـي بيـت الجفـاء وانـت تبنـيـه =وتسوق لي جيش المفارق على اركاب
اون ونـاتــي واســـوق الـمـشـاريـه =وتصـدنـي بـرمـاح وتكـشـر الـنـااب
اختار بعدي الشاعره القديره
ام فيصل (خنساء الويلان)

[حمد الضوّي]

مطنوخ الويلان

مشهور الرشدان


صح لسانك أبيات ولا أجمل لافض فوك
ماشاء الله عليك ماطولت بالسجن


بإنتظار أم فيصل



تحايا للجميع

[سعد النفج]

صح لسانك يا مشهور و حضورك اسعدنا ..
لو انه سجن لكن وش نسوي و أنا أخوك على شان الشعر تهون أيام الجلسه خلف قضبان السجن الشعري ..
و ننتظر اختنا ام فيصل ..

[طيف القصيد]

ياهلا وغلا

بربعي وعصابة راسي

ماهقيتها منكم تسجنوني

ونا اختكم بوجه هالشتاء والهبات البارده

افا افا لا والعيشه خبيزات ن يابسات

لو تحصل جبينه غير اللي فوق بالدريشه يمديها حمضت

حرام والله

ونت يامشهور

يامطنوخ لاتفرح ترى برجعك للسجن بس بعز البرد

وراك وراك ولو بعد حين


فكره جميله تحرك جمود الشعراء شوي

وقريب ان شاءالله اطلع وتنتهي محكوميتي

كل الشكر

[سعد النفج]

يا هلآ بك يا خيتي ام فيصل ..
و حضورك فخر لنا ..
و الله يهديه مشهور ما لقى الا ام فيصل ..
لكن بإذن الله سنستمتع بإبداعاتك كما عهدناك ..
الله يعينك على السجن ..

[طيف القصيد]

عندي هالابيات جديده جدا
بس اخاف تزود محكوميتي بس يالله دامها خاربه خاربه خلونا نعميها

صدام راح وكن ماصار ماكان
..................................ضحيه بالعيد وجرح مسمر
واهانه لكل العرب مر الازمان
................................وشموخ رجال على الحبل شمر
ومن عقبه معمر جازوه خذلان
.................................الوايلي اللي عليهم تامر
جروه في الشارع مدمى وعريان
................................ماكنه بالحظه ملك او تامر
وسلطان ماله بالتماثيل عنوان
..................................يكم ضعيف من فراقه تذمر
تبكيه ثكلى مالها ربع وخوان
.................................ودمعة يتيم مارسمها مصور
بالمجد له ملفى ومنجى ونيشان
...................................وحروف بالعزه تزين وتسطر
من عقبها مافيه بالكون سلطان
...................................ولا على الدنيا مخلد معمر

الله يرحم ابو خالد


اطلع ولا اجيب احد يكفلني

[سعد النفج]

صح لسانك ام فيصل ..
و سلمتي من السجن و تم تحريرك بهـ الابيات الرائعه و اللي تعبر عن نفسها و عن ابداع شاعرتها ..
ياليت تختارين ( شاعر ) او ( شاعره ) على شان يدخل السجن و يحرر نفسه بأبياته ..
.
و دمتي بخير يا مبدعه ..

[محمد دعسان]

شاعرتنا القديره ام فيصل
صح السانك ملايين
وبس وين السجين الي بعدك
وللعلم
ومعمر ليسى عنزي
http://www.weelan.com/vb/showthread.php?t=22040
لك اختي الفاضله جزيل احترامي
بس لاتسجنيني دوري غيري
الله يحفظك

[طيف القصيد]

سعد النفج

محمد دعسان

كل الشكر لكم نورتوني واسعدتوني وصحت قلوبكم يارب

اختار الي بعدي
الشاعر

سعود راجي الفريح

اغلى تحيه للجميع

[سعد النفج]

العفو اختي ام فيصل و لك جزيل الشكر و التقدير ..

و ننتظر الراقي سعود الراجي ..

كيف سـ يتحرر من السجن و بالتأكيد سيكون الإبدآع حليف شاعرنا بإذن الله ..

[حمد الضوّي]

أم فيصل


صح لسانك وسلم بنانك يابنت أهل الجود والكرم
وننتظر الشاعر سعود الراجي الفريح
بالتأكيد سوف يمتعنا بمايبوح به



تحايا للجميع

[محمد دعسان]

ياسعووووووووووووووووووود وينك

[سعود راجي الفريح]

الله يسعد مساكم جميع
والله دوبي دريت يااخواني


بلا شك فكره شاعر متميزه بس لو مافيها سجن ياسلام ههههه حمد الضوي يقول ماعمري طبيت السجن لا ابشرو بواحد محترف هههاي
كنت فرحان اول سمعت الخبز والجبن بسرعه دخلت بسرررررررررعه الله يسامحك ام فيصل انتي المتسببه
عن اذنكم باروح السوبر واجي لي عوده

[محمد دعسان]

هلا بك ياسعود
الله بمسيك باالخير
ننتظر ابداعك اخي الكريم

[سعود راجي الفريح]

سلام عليكم ورحمة الله،،،،،،،، جينا




الله وكبر يوم ربي صوره باحلى الجمال
الله عطاه الزين من ماطاه حتى مفرقه


لون الشفايف والخدود الحمر والحاجب هلال
والضحكه اللي كل مالدت عليه تشرقه

الخشم سلت سيف اخو نوره لتاديب الرجال
متناسقن مع وجها النير وشمسه مشرقه

والصدر دوله مستقله مادخلها الاحتلال
فيها الكمترى والنهر يسقيه ماجف اورقه

ياقامت اتجعد شعرها صابني مثل الهبال
ياخذني الوجاس والتفكير والقاف اطرقه

في ذمتي من بعدها الغفرات ماتسوى ريال
ودك توديهن على ماقيل يم المحرقه

ياجرح قلبي كل ماهبت ذعاذيح الشمال
يوم اتذكر ريحت الكادي بجسمه وعرقه


وسلامتكم بشرو عسى فيه عفو من السجن

[حمد الضوّي]

الشاعر / سعود الراجي


صح لسانك وبيض الله وجهك شامخه من شاعر شامخ
بالتأكيد هذه تشفع لك بالخروج من السجن وتعطيك
صلاحيه تختار لك شاعر وتدخله مكانك ويبقى
حتى يدبر نفسه وإلا يجيب كفيل

أنت من يختار الشاعر
بارك الله فيك




دمت بخير وعافيه

[سعد النفج]

الله الله صح لسانك يا سعود ..
مثل ما قالك اخوي حمد ..
او نرجعك للسجن و يا فرحة ما تمت ههههه
.
ننتظر اختيارك يا سعود أو حنا اللي نختار شاعر / شاعره ..

[سعود راجي الفريح]

صحت ابداااااانكم جميع

لاكن انتم روعتوني
ونسيت اللي اختار
الحمد الله اللي سلمت


مدري عن نضامكم اللي سبق له السجن اول يحقلي اختاره

الشاعره ام فيصل

تعالي هناااااااااااا

عندي نضام جديد


ردي على البيت

اربع ابيات

على نفس القاف

انا ليه ثلاث ايام نوم الناس مانامه

اذا ماطاب نوم الجنب الاول جيت لثاني
ننتضر الرد

[طيف القصيد]

الله وكبر يوم ربي صوره باحلى الجمال
الله عطاه الزين من ماطاه حتى مفرقه


من جد ابداع قصيده جميله انا اول مره ادري ان السجن ينمي المواااهب هههههههههه


سلمت انا ملك المبدعه

[سعد النفج]

صح لسانك ام فيصل ..
و بيت يغني عن الحديث ..
مميزة ..

ياليت تختارين سجين أو سجينه في سجن الشعراء ..

[سعد النفج]

سـ يكون السجين القادم ..
الشاعره المميزة : بنت الكحيلا ..
سـ يتم تحريرك أختي بنت الكحيلا بعد أن تضعي بيت او بيتين أو ثلاثة أو حتى أربع ابيات هنا ..
لتكون كفالة لك و من ثم تختارين شاعر أو شاعره ..
و لنا موعد مع الابداع مع الراقيه شاعرتنا / بنت الكحيلا ..

[حمد الضوّي]

الشاعر القدير

سعود الراجي


صح لسانك أبيات من ذهب لاهنت ابا فيصل

وشكرا ً لك أخ سعد النفج

على إختيار الشاعره القديره

بنت الكحيلا

بإنتظار الإبداع



تحايا

[بنت الكحيلا]

مشكور اخوي سعد النفج والله يعطيك العافية على الموضوع الجميل

وهذه ابياتي علها تخرجني من السجن

لعن ابو جيش الغلا لجلك هزمني

لك غلبني ثم اخذني لك اسيرة

ما عملت احساب له يوم اقتحمني

احسب اني جاهزة له با الذخيرة

يوم شفته في هجومه ما رحمني

له رفعت ايدي قلت الامر خيره

جابني لك واشهد انه ما ظلمني

ديرتك تغني ابد عن كل ديره


اختار بعدي الشاعرة بنت راشد

[سعد النفج]

صح لسانك بنت الكحيلا و لا غرابه ..
ابداع من أول حرف إلى آخر حرف ..
ما شاء الله ابيات جمعت المفردة الرائعة و الصورة الجميله ..
و بانتظار الشاعره بنت راشد ..
و موعد مع الإبداع ..

[سعود راجي الفريح]

بنت الكحيلا

اسم على مسمى

شاعره متمكنه مشاالله عليك
ابداااااااااااع بلا حدود
صح لساااااااااااااااااااااانك
مليووووووووووووووون

[حمد الضوّي]

بنت الكحيلا


صح لسانك أبدعتي ولاهي غريبه عليك
الإبداع بارك الله فيك





تحايا

[سعد النفج]

و لا زلنا ننتظر الراقية بنت راشد ..

[سراب نجد]

صحة اللسنتكم جميعاً

لكم مني جزيل الشكر والتقدير

[سعد النفج]

سراب نجد ..
شكرا لمرورك و اتسجيل حضورك في هذا الموضوع الذي يزداد رونقه بمتابعتكم ..
دمت بخير ..

[سعد النفج]

نداء لشاعرتنا بنت راشد ..
و في حالة تأخر الشاعره سـ يتم اختيار سجين آخر ..
و لكن الجميع يطمع بقراءة الإبداع من شاعرتنا المميزة ..

[سراب نجد]

سعد المدير يالربع مسجوني

بدل اللي راح هارب من سجونه


أطلعوا مديركم كيف هلوني

سجنت المير وشي تسمونه


المدير ايصيح ويقول تكفوني

سهراً بالسجن ما تغمض أعيونه

ههههههههههههههههههههههه
لك يابو شايش وللجميع تحياتي

[سعد النفج]

سراب نجد ..
صح لسانك ..
يجيك الدور لا تستعجل رزقك و انا اخوك هههههه

[سعد النفج]

سراب نجد الله يحيي حضورك
دعيتني للسجن و اقول لك تم

لكن تعال وجب غداك و فطورك
و ادخل بسجن الشعر و بداخله نم

حياك يا سراب نجد ..
تفضل السجن ينادي عليك :)

[سراب نجد]

حياك الله أخوي سعد بس أنا عندي مفاتيح لجميع الأقفال ... وأنت واحد من هذه المفاتيح

ماننسجن لو شفت ربعي عزيزين /// ربعي هل الطولات سقم المعادي

وأبا أستلف يا صاحبي منك بيتين /// والسجن ما هو زين وقت العيادي

يا مشرف الموقع ترى الناس دارين /// بأنك تحب الطيب جزل المبادي

لكم تحيه من سراب الميادين /// ما ينسجن يأهل الوفاء والرشادي

أن شاء الله يطلعوني وأن مأطلعوني أخرب سجنهم أشخمط على جدرانه
هههههههههههههه ههههههههههههههه ههههههههههههه
لكم شكري وتقديري

[سعد النفج]

هههههههههه

صح لسانك يا سراب نجد ..
و بيض الله وجهك ..
و فداك جدار اسجن .. دام هذي ابياتك ..
نبي نجيب لك طباشير و أقلام ..


اختر شاعر بعدك يا بعد راسي ..

[سراب نجد]

صح بدنك أخوي سعد وجهك ابيض ويفداك من عاداك

والطباشير عطها أبو أريج هو الشاعر اللي بعدي مختاره

[سعد النفج]

الله يعطيك العافيه و ننتظر ابو اريج ..


نداء من سجن الشعراء لأبو أريج ..
.

[سعد النفج]

تـأخر ابو أريج ..
راح نختار شاعر ثاني ..

الاختيار للشاعر : عبدالرحمن الجابري ..
و كفالته ابيات من بيت واحد إلى اربع ابيات و بعدها يختار شاعر آخر ..
.
بانتظار المبدع عبدالرحمن ..

[عبدالرحمن الجابري الحربي]

هلا بك ياغالي. .. بِــ??سَِّ مِْــِ???َِ هقيتك تسجني ليلة العيد. لكن تمون يابو شايش. لي عودة. ..!!!!

[سراب نجد]

سعد النفج كل عام وأنتم بخير والجميع بخير

العرب وأنا أخوك تبي تعيد ما فيه أحد يبغى السجن وقت العياد

لا كن غير مسماه من سجن إلى أسم أحلى ولا أسجني وسجنك حتى الأمر الأخير

ههههههههههههههههههههههاي حلوه أسجني وسجنك

لا بلاش خلها راحه مابين الشوطين هههههههههههههاي

لكم تحياتي

[صبيح العوض]

سراب نجد

عيدك مبارك وكل عام وانت بخير

راحه بين الشوطين فكره طيبه اما السجن مشكله وقت الاعياد الناس تبي تذبح ضحياها ماهي فاضيه لسجن

[سراب نجد]

صبيح العوض
كل عام وأنت بخير ومن العايدين الفايزين

وشورك وهدايه الله راحه بين الشوطين

لك شكري وتقديري

[عبدالرحمن الجابري الحربي]

قالوا تفضل للسجن رديت يازين السجن
ياليت كل سجون هالعالم تشابه سجنكم

مدااام تكفلني بيوت الشعر عز الله لفن
يا جعلها ترضيك ياسجان يومن جاتكم


سجنك ولا سجن الغرام اللي خدا قلب ثمن
الله يرد القلي سالم غانم{ن} باخبااااركم

يا منتدى الويلان يامن صرت للدحمي وطن
ياجعل بالخيرااات في كل عام عايد عيدكم

وسلاااامتكم


عسى تكفلني هالابيات وارووووح الحق اذبح الضحية والله قهر النااااااس تعيد وأنا خايس بهالسجن ولحد عاااايدني ’’’’’


هههههههههههههههه

كل عااااااام وأنتم بخير جميعا ....

[عبدالرحمن الجابري الحربي]

سرااااب نجد وصبيح العوض السجاااان مدااااوم حتى بالاعيااااد مو رإااضي بالاسترااااحة بين الشوطين ولا يازينهااااا لو جااااات

هههههههه

عشاااان كذا هدي أبيااااتي عسااااه يفكني وأعيد مع الناااااس



قالوا تفضل للسجن رديت يازين السجن
ياليت كل سجون هالعالم تشابه سجنكم

مدااام تكفلني بيوت الشعر عز الله لفن
يا جعلها ترضيك ياسجان يومن جاتكم


سجنك ولا سجن الغرام اللي خدا قلب ثمن
الله يرد القلب سالم غانم{ن} باخبااااركم

يا منتدى الويلان يامن صرت للدحمي وطن
ياجعل بالخيرااات في كل عام عايد عيدكم

وسلاااامتكم


عسى تكفلني هالابيات وارووووح الحق اذبح الضحية والله قهر النااااااس تعيد وأنا خايس بهالسجن ولحد عاااايدني ’’’’’


هههههههههههههههه

كل عااااااام وأنتم بخير جميعا ....

[سعد النفج]

كل عام و انتم بألف خير و صحه و سلامه ..

و السجان موجود ما يروح بعيد ..
هههههههه و لو يروح ما يحتاج مفتاح
السجن تلقائي من تقول الابيات فتح لك الباب ما شاء الله ..
.
و صح لسانك ملايين يا عبدالرحمن ..
ابيات جميله و الله يعين على سجن الغرام ..
.
عاد الحين شف لك شاعر و خله يحضر هنا ..
.

[عبدالرحمن الجابري الحربي]

الغاااالي السجان سعد .. صج بدنك ... واعذرني على الاخطاء الاملااائية ..( قلبي ثمن ) (وليست قلب ثمن ) ...

أما اختيااااري فما ودي ادخل احد السجن بالعيد لكن هذا حكم السجن ...

اختااار الشاعر الرااااقي الغااالي الملكي بندر السديري ...

مو لانه يستحق السجن لاني مشتاااق اسمع شيء من كتاااباااته ...

[**masha3el **]

السجان الفاضل
سعد النفج

كل عام وانت بخير
واهنيك على الموووضع من جد روعه
والحمدلله مو شاعره بس ازووووور المساجين من الشعراء

يالله السجن للجدعان
كل عام وانتم بخير
وصحت السنتكم جميعا ابدعتوا وا متعتوا
شدووووووا حيلكم

[سعد النفج]

معذور يا عبدالرحمن و المعنى و اضح و انا اخوك ..
و ننتظر شاعرنا الراقي / بندر السديري ..
.

[سعد النفج]

مشاعل ..
ارحبي يا خيتي و ابرك الساعات ..
.
انتظري اسمك بعد فتره بين المساجين :)
شكل عندك بويتات ما تطلع لين تشوفين جو السجن ..
.
يا هلا بك بأي وقت و سعيد بحضورك ..
لا عدمنا تواصلك ..

[بندر السديري]

السلام عليكم ورحمة الله وبركاته
عبدالرحمن الحربي : تمووون ياالغالي




بهرت دلة نشيدي وسقت فنجالي=للطيبين المطانيخ الهواويه
اللي على ساحة الشعار تبرالي=ترقب سحاب القوافي من مناشيه
ياالحربي الشعر لامن جا على بالي=تشوف اله في حجور العين ماريه
يجذب حنايا الظلوع ويبري الحالي=عن شمس الاحزان إلي في فيته فيه
رفيقي اللي وقاني اشهب الالي=لا هوجس القلب وانقطعت عراويه
اختار الرائعه والغاليه : بنت نجد
تفضلي ياالحوراء

[حمد الضوّي]

الشاعر المميز

بندر السديري


صح لسانك كفيت ووفيت بيض الله وجهك

وبإنتظار شاعرتنا المبدعه

الحوراء بنت نجد




تحايا للجميع

[عبدالرحمن الجابري الحربي]

بندر السديري .. ..

صح لسااانك .. امتعتنا يعيطك الف عافية ..

وبانتظااار الرائعة بنت نجد

[سعد النفج]

صح لسانك يا بندر و يا سلام عليك و بيض الله وجهك على هـ الابيات الراقيه ..
و على البركه الخروج من سجن الشعراء و اللي مثلك ودنا كل شوي و هو داخل السجن ..
مبدع الله لا يهينك ..
و بانتظار الراقيه الحوراء ...
.

[سراب نجد]

صح السانك عزيزي بندر السديري

أبيات في قمة الروعه الله لا يهينك ويسعدك دنيا وأخره

لك شكري وتقديري

[سراب نجد]

يا مدير المساجين الله يسلمك ويمسيك بالخير ويمسي الجميع بالخير

الشعراء اللي تأخرو ما دخلو السجن ترى الكفاله عليهم مدبوله مثل أبو أريج وغيره

ولا نسجنك أنت عنهم وكفالة المدير غير شكل هههههههههههههههاي يروح فيها مديرنا

لكم تحياتي وتقديري

[العنود حسين]

السلام عليكم ورحمة الله وبركاته

اسمح لي ابدي اعجابي بقلمك وتميزك واسلوبك الراقي وتالقك ولكن الموضوع نفسه في سجن الادبي وانا سجنتك كم مرةالفرق انك لزم يكون شاعر وانا لاهذاالفرق بينناودمت بخير :sm257:http://www.weelan.com/vb/showthread.php?t=22781

[سعد النفج]

الراقية العنود حسين ..
شكرا لك على كلماتك و إشادتك ..
و سعيد بحضورك مهما كان سبب الحضور و لكن مجرد حضورك هنا يبعث الفرح ..


يالعنود حسين حييتي هنا = بـ سجن شعّار(ن) لهم بالشعر بآع
و الْسجن ما هو من افكآري أنا = اعجبتني فكرة(ن) فيها ابتداع
دام بدع الحرف من ناس سجنا = جِعْل سجن الشعر بيبانه وسآع



و اعذريني يا خيتي و الموضوع له غرض شعري خاص بإبدآع الشعراء
و في موضوعك خاص بالانتقآءات الشعرية ..
و اتمنى الدخول على هذا الرابط ..
http://www.weelan.com/vb/showthread.php?t=17539

شكرا لمرورك و دام تواصلك اختي العنود ..

[سعد النفج]

شاعرتنا الحوراء بنت نجد تأخرت لذلك سـ يتم اختيار شآعر أو شآعره ..
انتظرونآ مع السجين القآدم ..

[سعد النفج]

السجين القآدم هو الشآعر : ابراهيم السلمي ..
ننتظر ابيات الراقي ابراهيم ..
كفآلة الشآعر ابراهيم هي : بيت أو بيتين أو ثلاثة ابيات أو حتى أربعة ..
و بعدها سوف يختآر شاعر أو شاعره لـ يمكث في سجن الشعراء حتى يقدم ابيات الكفآلة ..
.
بانتظار الراقي ابراهيم ..

[ابراهيم السلمي]

يعطيك العافية اخوي الغالي سعد النفج

للامانة لم اطلع على هذا الموضوع من قبل ولكن سعيد بدعوتك اخي المشرف القدير سعد النفج

ابيات كتبتها على شكل رسالة جوال وهي لا تتجاوز ثلاثه الى اربعه ابيات

اتمنى المعذرة في ذلك


صورتك بالبال لا يمكن تروح
جل من سواك ياهذا الملاك

انت روحي يوم انا لك صرت روح
كل ماملك ياحياتي هو فداك

بنت حايل بلسم لكل الجروح
الملاك اللي بعاده لي هلاك


تحياتي للجميع

اخوكم

ابراهيم السلمي

[ابراهيم السلمي]

بالنسبة للاختيار اخي الغالي سعد النفج

اترك هذا الامر لشخصك الكريم

بحيث انك على درايه كافيه بالاعضاء


دمت لنا ودام تميزك

لك مني ارق التحايا

اخوك


ابراهيم السلمي

[سعد النفج]

صح لسآنك اخوي ابراهيم ..
و ابيات عاطفية راقية و أنت دوماً مميز ..
لله درك و سعيد بمشاركتك اخي ابراهيم ..

و دامك تركت الاختيار عندي ..
السجين القادم هو أو بالأحرى هي الشاعره غموض الشمال ..
.
بانتظار شاعرتنا الأخت غموض ...

[غموض الشمال]

اولآ ألف شكر لك اخوي سعد على هذا الموضوع الراقي
وسعيده لدوعتي لهذا السجن الجميل ^_^
لي عود ه ان شاء الله بعد أفاقتي من جو السجن .. مصدومه

تقديري لك

[سعد النفج]

حياك الله اختي غموض بـ سجن الشعراء المبدعين ..
و الله يعينك على جو السجن ..


بانتظار نبضك ..

[غموض الشمال]

تحيا وتدوووم اخوي سعد..
ابيات كتبت للتو وارجو المعذره ان كان فيها قصور..



يالله عسى هالعام خير بقدومه=ونودع ايام الحزن والتعاسه
والماضي اللي فات نطوي همومه=ونمحي من الذكرى غرابيل كاسه
ونخيل براقه ونرجي وسومه=يغسل بخيره جوٍ العج حاسه
وتصفي لنا الدنيا وخيرك تدومه=وتزهر ورود العمروتروي يباسه



وسلامتكم

[غموض الشمال]

نسيت الكفيل..؟؟
ان جملت الابيات فانت كفيلي اخوي سعد

تقديري

[سعد النفج]

مجمله يا غموض و صح لسانك ..
ابيات رائعه و كل سنة و انتي بخير ..

جلوس في سجن الشعراء و لي عودة بالأبيات ..

[سعد النفج]

هذ ابيات الكفآله ..


الشوق يرعى بالفياض الوسيعات
و انتي تسوقينه على كل فيضه

نوخته بصدرك و قلتي سهالات
صدري ربيعه يذبح انفاس قيضه

السجين القآدم هو الشآعر : محمد دعسان ..
حياك الله يا بو مرآم ..

[غموض الشمال]

صح لسانك شاعرنا ومشرفنا القدير / سعد
وبانتظار الشاعر العذب / محمد دعسان
تقديري

[الحوراء بنت نجد]

حياكم الله

موضوع يستحق التوقف \ ما أروعه من مقام

بين قضبان الأدب والحرف0

اشكرك شاعرنا بندر السديري لأختياري سجينة

تستلهم عذب المعاني منكم شعراء \شاعرات

ويلان ورواده الكرام0

اعتذر 00 كنت في رحلة عمل لدبي وحال اتصالي

وجدت نفسي محرره بمشاركة من بعدي 0

شكرآ لكم جميعآ0 ولك بندر الشكر لمنحي فرصة

هذا التواجد0

[بندر السديري]

بنت نجد
اصلا عارف انك مني باالديره عشان كذا اخترتك
لان ماودي اورط احد ياذكيه ههههههههه

[الحوراء بنت نجد]

جزاكــ الله خير يابندر00 لكن الذكاء واضح

في اجابتكــ ههه

[محمد دعسان]

مسا الخير
ياخوي القدير /سعد النفج
انت وش تبي بحلقي كل ما شفتني تسجني
هههههههههههه ههههههااااااااي
عسى.. تكفلني ها البيتين

انا صديق الحزن لي عدة سنين
-----------------يا كثر نزف جروحي الخافياتي

تعـبـت وانـــا اكـتــب قـصـيـد المحـبـيـن
-----------------ولا لـقـيــت إلا الـجـفــا فــــي حـيــاتــي

هـــذي حـيـاتـي كـلـهـا بـيــن قـوسـيــن
------------------مـــن قـو...بـاسـي مـانـويــت الـتـفـاتـي


ياخـوي دمـع العيـن مخفـيـه مــا يبـيـن
-----------------لــكـــن تـقـاسـيــم الــحـــزن بـايـنـاتــي


---------------------------------------------

السجين القادم هو
مشرفنا القدير / سعد النفج

[سعد النفج]

هلا بك يا بو مرام و صح لسانك و الله يسعدك دوم و يبعد عنك الحزن ..
ابشر ..
هذا انا داخل السجن ..
و لي عودة بأبيات التحرير ..

[سعد النفج]

إذا توادعت مع عمـري تهـل الدمـوع
و شلون ما ابكي و انا اللي فاقد ٍ شمعتي
فقدت بغيابها حلـو الحكـي و الطبـوع
و رافقـت بغيابهـا تنهيـدي و دمعتـي
ليت اشيل ارتباطي بين سبـت و ربـوع
و اعيش بـ أول خميسي و انتظر جمعتي


السجين القادم : الشاعره الحوراء بنت نجد

[سعد النفج]

لا زلنا ننتظر الراقيه الحوراء ..

[سعد النفج]

نتمنى أن تكون شاعرتنا الحوراء بخير ..
.

السجين القادم هو مشرفنا الراقي : حمد الضوي ..
.
نرحب بك في سجن الشعراء شاعرنا المميز و ننتظر ابياتك الراقية ..

[الحوراء بنت نجد]

حياكم الله 0 يعني ياسعد مافيه فكه ههه

الله يفك أسر الأسير في كل أرض 0




يالوايلي قرّبْ المبْعد وولّع شموع=والليل لاظْلمْ عليك بشبّ نِيرانها
إلْيا متى والدموع فْبارق ٍ له تِلُوع=يكْفِي نِوى والعزيزه شهْد مِيدانها
إرْحل وظرْفك على شكْواك حر ٍ شفُوع=والا طِرِيدك يضحّي لجْل عنوانها



سجيني شاعرنا سعد النفج0 في انتظاره

[الحوراء بنت نجد]

اسفه والله ياسعد النفج شكلي جيت متأخره

ولا انتبهت لردك الأخير0

ويكون السجين الشاعر الرائع حمد الضوى

اعتذر مرة اخرى0

[حمد الضوّي]

هلا وغلا

مشرفنا المميز

سعد النفج


صح لسانك مليار على الأبيات السابقه

وشاكر لك إختيارك لي لهذا السجن

( سجن الإبداع والمبدعين )



ولي عوده بإذن الله تعالى









تحايا

[حمد الضوّي]

هلابك أختي

الحوراء بنت نجد

صح لسانك وإعتلى شانك أبيات رائعه
والحمد لله إنك كنتي بخير وعافيه وبالتأكيد
عذرك مقبول بالنيابه عن أخوي سعد

توقعتك توسطين لي بالخروج من السجن
وأثريك بتزودين المده كم يوم هههههه







تحايا

[حمد الضوّي]

من خلف قضبان

( سجن الإبداع )




من نشدني كيف حالك قلت له لاباسي=بخير عايش والهموم بداخلي حابسها
والسبب ظلمك وجورك يالزمان القاسي=كسبنا منك المواعظ والعبر ندرسها
الله أكبر يازماني منك شيّب راسي=شفت نارك تاكل أخضرها قبل يابسها
التطوّر للبلاد الكافره نبراسي=والعرب تفرس بعضها والزمن يفرسها
يكسبون الغرب علم بكل فصل دراسي=والعرب مريوسها يقلب على ريسها
يالله تعز البلاد اللي جبلها راسي=وفي حماك من البلاوي والفتن تحرسها
بظل من حكمه جعل ميزانها متواسي=يالله إحفظ مملكتنا وإرحم موسسها





السجين القادم الشاعره القديره/ أم فيصل


أجل التحايا للجميع

[سعد النفج]

صح لسانك شاعرتنا الحوراء ..
و الله شفتك تأخرتي و ارسلت بلاغ عنك
لكن حضرتي و كفيتي و وفيتي و بيض الله وجهك ..
و تم تحريرك بالتأكيد و السجين اللي بعدك هو حمد ..
و صح لسانك يا حمد و تمون يا بعد راسي و الابيات لا تستغرب عليك يا بعدي ..
و ننتظر الشاعره المبدعه : ام فيصل ..
.

[طيف القصيد]

من خلف القضبان

ام فيصل

حسبي الله على عدوك ياحمد

مع هالبرد والامطار تسجني الله يعين

الي بيزورني يجيب لي دفايه ولاكم حطبه بتدفى جمدت

شكل اول بيت من القصيده بيكون

ياناشد عني تراني تجمدت
....................... وبالسجن مانوم الاوادم لفاني
ههههههههههههههههههه


لي عوده

[سالم صالح]

ابداااااااااااااااااع متواصل وحروف تنبعث منها رائحة الجمال والابداع


فالله دركم من اقلام مميزة ولله در صاحب الفكرة


تقبلوا تقديري

[سعد النفج]

ام فيصل صح لسانك ..
و الله يعينك على البرد و الجووع ..
و ما اخترتي السجين اللي بعدك ..
.
الله لا يهينك يا ام فيصل ..

[طيف القصيد]

هههههههههه

اعذروني نسيت اختار الي بعدي

ليه اروح بعيد اختار سالم صالح
واتمنى يختار بعده حمد الضوي بابيات ارتجاليه ابيه يذوق البرد شوي

اغلى التحايا للجميع

[محمد البويليد العنزي]

وأنا أشوف بعض الشعراء احيان نفقدهم أثريك متسلطن عليهم يابن شايش
اللي تسجنه واللي تجبره يسجن غيره
ههههههههههههههههههههه
كل الشكر لك اخوي سعد كعادتك مبدع
وكل الشكر لشعرائنا المبدعين اللي بدورهم الفعال زادو الموضوع جمال

[سالم صالح]

مساء الخيرات ,,,,

ولي عودة قريباً بس ابجرب السجن شوي بحس بمعاناة السجناء ,,,,,,,

والله يهديك ياام فيصل مالقيتي الا المربعانية اسجن فيها ,,,,,,

تقديري وانتظروني

[سعد النفج]

ام فيصل..
شكرا لعودتك و ننتظر الشاعر سالم صالح ..
و شد حيلك و لا تنسى الفروه ..
.
با نتظارك ..

[سعد النفج]

محمد البويليد ..
يا هلا و مرحبا ..
و الله يعطيك العافيه على مرورك ..
و انتظر دورك و جهّز الفروه و انا اخوك ..

[محمد البويليد العنزي]

الله يعافيك

ولاكن انت بس لاصملت علمني اخذ احتياطاتي من بدري
ههههههههههههههههههههه
بأنتظار الشاعر// سالم صالح

[سالم صالح]

العذر والسموحة بتواضع ابياتي ولكن السبب البرد المشرفين على السجن ماجابوا لنا بطانيات الله يهديهم

ولكن عاد ابي الشاعر / محمد البويليد ,,,,,,,, يجرب هالسجن ارحب ارحب
واسف لعدم اختياري للراقي / حمد الضوي ,, كما طلبت الاخت / ام فيصل ,, لانه مر على هالسجن اكثر من مرة بعدها اعداااااااااااام هههههههههه الله يحماه يارب ,,,





يابنت قالوا في جميل المعاني=العرف سهم ومن يصيب الرمية
تعريف عن مجمل شعورٍ حداني=من سبته صكت ضلوعي عليه
الواجب اللي جيت يمه دعاني=بحروف شعري والقوافي هدية
ابي ابين كيف معنى اتزاني=اقيس منطوقي واسوق العنية
كله لجل نفسي ابحفظ حصاني=عن زلت الاقدام ضحك البرية
ولاجيت احدد بالمفاخر مكاني=معروف مطلاعي بعالي طمية
الطيب والتوجيب وحس التفاني=والخوة بدمي وطيب السجية




تقديري وبانتظار ابداااااع / محمد البويليد

[محمد البويليد العنزي]

صح لسانك اخوي سالم
ولاكن الله يهديك هذا وانا معك ولابيهم يسجنونك اثريها جت منك
هههههههههههههههه
المعذره توي جاي من سفر
ولاكن لي عوده عن قريب

[محمد البويليد العنزي]

أعذرونا الابيات على عجاله فاجأوني بالسجن والطفش يلعب دوره
والسجين القادم هو اخوي حمد الضوي والله أنه غالي عندي بس الشكوى لله الذنب على ابو شايش
هههههههههههههههههههههههههه
ياهـــاجـسـي حـظـر ولافـيه فــكْه
,,,, ومن سالم الصالح مافيه أفتكـاكي
حكــم عـليه بالسـجن دون شـــكْه
,,,, وسـعد علـى بـوابة السـجن تـاكي
ولفيت وسط السجن في كـل سـكْه
,,,, ومن ضيقتي بالسجن زاد أرتباكي
رجـــلاً همـومـه كـل ساعـه تـدكْه
,,,, وينظام من همه وكثــر المشــاكي
ورجـلاً بنفـسه ماتجــيه المشـكْه
,,,, ولاهو مع هموم الزمان أحتكــاكي
وأناأطلب الله كل ماجـيت مـكْه
,,,, أيخفـــف هـمـومن عــليه تــراكيْ
وبـاب المحـــبه يالــغــلا لاتصــكْه
,,,, ماحدن جرح قلبي وضامه سواكي
(( عسى هالابيات يشفعن لي واطلع ))

[سعد النفج]

الله الله ..
من ابداع سالم الى ابداع محمد ..
الله يعطيكم العافيه ..
و صحت السنتكم ..
و مبروك الافراج ههههه
عاد ننتظر حمد ..
و لنا موعد مع الابداع ..

[حمد الضوّي]

أم فيصل
سالم صالح
محمد البويليد


صحت ألسنتكم جميعا ًمبديعن

وأشكرك أخوي سالم اللي رحمتني ولكن أم فيصل ومحمد البويليد
قلوبهم قاسيه الله يسامحهم والمربعانيه توها داخله
وكان السجن على خبر ي درايشه رايحة ٍ فيها لو يحط
السجين 10 بطانيات كأنه براس جبل عرنان اللهم عافنا
ولا أعفي الغالي سعد من المسؤوليه
كل هالأمور من تحت راسه

(( أما عاد عدام يابو صالح إلا الربع أرحم منك))


لي عوده بإذن الله



تحايا

[محمد البويليد العنزي]

سعد النفج
صح بدنك

[محمد البويليد العنزي]

حمد الضوي
صح بدنك ولاودي أسجنك بس يالغالي غصبن علي وذنبك على أبو شايش
بس شد حيلك وأنشاء الله أني أزورك يالبناخي
هههههههههههههههههههه

[حمد الضوّي]

عدنا لكم ونستبيحكم عذرا ً تأخير غير مقصود

وعسى كل تأخيره فيها خيره

أبيات أتت من داخل هذا السجن الشعري الفريد من نوعه والمليئه جدرانه باللوحات الشعريه المذهّبه





هالسجن للشعار مامثله سجن=فكرة زميل وتحتسب له بادره
عنبر به سمان القوافي يدرَجن=واصبح مكان المفردات النادره
لامن دخلناه الخلايا ينتِجن=ذي تارد الهاجس والاخرى صادره
فيه الفرايد لادعيناهن يجن=ادخل سجن واكتب شعر وتغادره
بابيات يشرحن الصدور ويثلجن=من بادرك باجزل معاني بادره
دام رعدن سحب القصايد ولعجن=جتك أودية شعري تجارا هادره
نخبة نوادر و احترص لايسمجن=شبحي سماوي ما لتفت للحادره
صدري لهن يشبه لميدان الهجن=اللي على حصد الجوايز قادره
باطلق سجن فيه المناظر يبهجن=ماهو مثل سجن الوجيه الوادره
لو جملة البيبان دوني يزلـَجن=ماودي أترك سجنكم و اغادره
ولاكايدات إلا من الله يفرجن=و{ ويلان } تنهض به سواعد كادره





مع أجمل التحايا

وأقول للشاعر / عبدالرحمن الجابري
تفضل لاهنت ولاتنسى الفروه نصيحه من أخو لإخوه

[عبدالرحمن الجابري الحربي]

صح لساااانك ياحمد ...

آسف توي اللي انتبهت أني مسجوون ...

والله ان قلبك طيب يوم تنصحني بالفروة .. بس كيف طاوعك تسجني ...

بس الله لا يهينك زورني وجيب لي معك حطب ...

تدري الفروة في المربعانية ما تجمل خصوصا ان جسمي نحيف ...

ههههههههههه

لي عودة ...

[محمد البويليد العنزي]

حمد الضوي مافيك حيله وصح لسانك حتى ترضى
وبأنتظار شاعرنا المبدع عبدالرحمن الجابري

[عبدالرحمن الجابري الحربي]

آسف على الإطالة ...

يــاحمد مـا دام خليتني أجلس وحيــد ... بين جـــدران السجـن والهبوب وبـردهــا
ودي أراجع حسابات نفسي من جديد ... واعرف اللي هو لها واعرف اللي ضدها
لاجل أعيش اللي بقالي بهالدنيا سعيد ... وارتقــي يــمّ الثريــا وابـــاري حـــدهــا
وسلااامتكم ...

الأبيات ممكن تكون مشروع قصيدة جديدة ..


واختاااار بعدي الشاعر المتألق : حمد الخمعلي

تفضل لاهنت

وقبل لا أنسى ترى الفروة خليتها لك عشاااان تدفى من البرد ...

[عبدالرحمن الجابري الحربي]

آسف على الإطالة ...

ياحمد ما دامك أجبرتني أجلس وحيد ... بين جـــدران السجـن والهبوب وبـردهــا
ودي أراجع حسابات نفسي من جديد ... واعرف اللي هو لها واعرف اللي ضدها
لاجل أعيش اللي بقالي بهالدنيا سعيد ... وارتقــي يــمّ الثريــا وابـــاري حـــدهــا


وسلااامتكم ...

الأبيات ممكن تكون مشروع قصيدة جديدة ..


واختاااار بعدي الشاعر المتألق : حمد الخمعلي

تفضل لاهنت

وقبل لا أنسى ترى الفروة خليتها لك عشاااان تدفى من البرد ...

[حمد الضوّي]

اقتباس:
المشاركة الأصلية كتبت بواسطة عبدالرحمن الجابري الحربي http://www.weelan.com/vb/mecano/buttons/viewpost.gif (http://www.weelan.com/vb/showthread.php?p=400888#post400888)
صح لساااانك ياحمد ...

آسف توي اللي انتبهت أني مسجوون ...

والله ان قلبك طيب يوم تنصحني بالفروة .. بس كيف طاوعك تسجني ...

بس الله لا يهينك زورني وجيب لي معك حطب ...

تدري الفروة في المربعانية ما تجمل خصوصا ان جسمي نحيف ...

ههههههههههه

لي عودة ...



صح بدنك شاعرنا عبدالرحمن الجابري
لولا طيبة قلبي يالغالي ماذكرتك بالفروه ولامن صرت دفيان ماعليك خوف
وإنشاء الله أزورك أما الحطب إعذرني غالي هالايام ولو بجيب من النفود ممنوع
يعني دبرلك دفاية غاز وإلا تحمل مايجيك يابعد راسي
ومادم جسمك نحيف أزين لك تجي عليك لفتين ويمكن يجي منها مخده بعد ههههههه




تحايا

[حمد الضوّي]

اقتباس:
المشاركة الأصلية كتبت بواسطة محمد البويليد العنزي http://www.weelan.com/vb/mecano/buttons/viewpost.gif (http://www.weelan.com/vb/showthread.php?p=400892#post400892)
حمد الضوي مافيك حيله وصح لسانك حتى ترضى
وبأنتظار شاعرنا المبدع عبدالرحمن الجابري



محمد البويليد

هلابك وصح بدنك ومرورك شرف يالغالي
لاخلا ولاعدم




تحايا

[محمد البويليد العنزي]

صح لسانك شاعرنا عبدالرحمن الجابري

وبأنتظار شاعرنا المبدع حمد الخمعلي

[سعد النفج]

صح لسانك يا حمد الضوي و بيض الله وجهك ..
وافي الله يستر عليك ..
و الف صح لسانك يا عبدالرحمن و مشروع قصيده ننتظرها بإذن الله ..
و ننتظر حمد الخمعلي ..
و موعدنا مع ابداعه ..

[عبدالرحمن الجابري الحربي]

اقتباس:
المشاركة الأصلية كتبت بواسطة عبدالرحمن الجابري الحربي http://www.weelan.com/vb/mecano/buttons/viewpost.gif (http://www.weelan.com/vb/showthread.php?p=400888#post400888)
صح لساااانك ياحمد ...

آسف توي اللي انتبهت أني مسجوون ...

والله ان قلبك طيب يوم تنصحني بالفروة .. بس كيف طاوعك تسجني ...

بس الله لا يهينك زورني وجيب لي معك حطب ...

تدري الفروة في المربعانية ما تجمل خصوصا ان جسمي نحيف ...

ههههههههههه

لي عودة ...



صح بدنك شاعرنا عبدالرحمن الجابري
لولا طيبة قلبي يالغالي ماذكرتك بالفروه ولامن صرت دفيان ماعليك خوف
وإنشاء الله أزورك أما الحطب إعذرني غالي هالايام ولو بجيب من النفود ممنوع
يعني دبرلك دفاية غاز وإلا تحمل مايجيك يابعد راسي
ومادم جسمك نحيف أزين لك تجي عليك لفتين ويمكن يجي منها مخده بعد ههههههه




تحايا
هلا بك ياغالي ..

أكيد أنت طيب وأنا استاااهل يااااخوك:tongue: ...

والحطب غااااالي لكن هين تبي تدخل السجن قريب جدا وتشحدنا نجيب لك حطب ... ههههههههه

وبعدين أبشرك ما يحتاااج دفاية غاز الفروة قضت اللزوم وخليتها لحمد الخمعلي عشاااان تدفيه ..

أما لفتين ومخده هذي الله العالم يمقن ايه ويمقن لا ..

[عبدالرحمن الجابري الحربي]

صح لسانك شاعرنا عبدالرحمن الجابري

وبأنتظار شاعرنا المبدع حمد الخمعلي
هلا بك محمد العنزي ...
صح بدنك ياغااااالي ...

وشاكر لك مرورك ...

[عبدالرحمن الجابري الحربي]

صح لسانك يا حمد الضوي و بيض الله وجهك ..
وافي الله يستر عليك ..
و الف صح لسانك يا عبدالرحمن و مشروع قصيده ننتظرها بإذن الله ..
و ننتظر حمد الخمعلي ..
و موعدنا مع ابداعه ..
هلا بك سعد النفج ..

صح بدنك ياغااااالي ...

وبإذن الله تكتمل القصيدة .. بس بعد ما نقضي من الاختباااارااات ...


شاكر لك مرورك ..