المساعد الشخصي الرقمي

مشاهدة النسخة كاملة : منقية الشعر ..مجموعة قصائد للمبدع عبدالله سماح المجلاد


خلف الغريب
12/01/11, (09:01 AM)
حقيقة أنا معجب وبشدة بالشاعر الكبير عبد الله سماح المجلاد وأعتبره رمزرا للشعر الحقيقي في هذا الزمن البئيس على الشعر ..

هنا أحببت أن تشاركوني هذه المتعة وهذا الاعجاب ..




(ياهوه)ضاع الشعر مَا بين (فتـح وحمـاس)=والجبهـه اشتـدّ مدفعـهـا ورشاشـهـا
وَاللَّـه يرحـم زمـان الشعـر يابوفـراس=سفيـنـتـه ضاع(نَوْخَذْهَاوِطَـوَّاشَـهْـا)
ياصاحبـي مابقـى بالشعـر لولـو/ومـاس=اللـي بقـى شوكـةٍ مفقـود منقاشـهـا
(ياقلّ) شعر الذهب (يَاكَثْر) شعـر النحـاس=والقافلـه روّحـت يـاطـول مطراشـهـا
والضوء ماعـاد يملـك زاويـه وانعكـاس=وسادات الابيات تشكـي سطـوة احباشهـا
عذرا القوافي تصيـح مـن القهر(لاَمِسَـاْس)=وعذريتـه تغتصـب فـي داخـل افراشهـا
وحال الشعر مُزْرِيَهْ جـداً وِ ِتِـدْمْ الحـواس=والرايـه ابْ(كَـف) (جِرْذيْهَـا وِخَفّاشْهـا)
(خَالِفْ وَتُعْرِفْ)وصبّ المهزله وسـط كـاس=فـي غابـةٍ والمرجـج تَدْهَـل احراشـهـا
والشعر في عصرنا الحالـي يعيـش انتكـاس=ويطْحَنْ ضلوعه رحـى نشـوى ومهباشهـا
متجـرد من/الأصل/والقاعـده/والأسـاس=واصبـح غريـبٍ بِدَاخـل بيئـةٍ عاشهـا
صـار اختبارات/تقـويـم ومساطرقـيـاس=ومـدارس النقـد زاد مناطـح اكباشـهـا
والنقد أضحى ضحالـة فكر،وافـلاس راس=فـي مدرسـه خـاب ريّسهـا وفرّاشـهـا
(هـذا يبيهـا طبـاق)(وذا يبيهـا جنـاس)=وذواقـة الشعـر ضاقـت ذرع باوبـاشـا
ماباقـي الاّ يُحَـدّدْ للقصـايـد مـقـاس=وطيب القصيده حسـب نوعيـة اقماشهـا
سِرْقَةْ قصيـده بكاملهـا يُسمّـى اقتبـاس=وِيْمَجّـدْ الشاعراللـي بالـردا حاشـهـا
وشاعر يجيك اب(قصيده)من خَيَاسْ الْ(خياس)=ويصعـد بترشيـح كاذبـهـا وغشاشـهـا
وشاعـر مجونـه تجـاوز عربـدة بونـواس=ويِْقال شِعْـرَكْ سحابـه هلّـت ارشاشهـا
وقصيدتـه بنـت ليـلٍ ماعليهـا لِـبْـاس=ماعـاشـت الستر،بالدنـيـا وَلاَعاشـهـا
الشعـر أصبـح بِأقـدام الضَحَالَـهْ يُـداس=يدهـس وروده(سِكَرْجِيْها)(وحشاشـهـا)
واغصان الابداع تشكي(من ظما)(من يبـاس)=مَابَلَّـلْ الغـيـث خَدّيْـهـا وَلاَناشـهـا
وجذور الابداع والاحسـاس تُقطـع بِفَـاس=وتموت موت الطيـور ابداخـل اعشاشهـا
مات الشعر في حياة المبدع (ابْ)كف يـاس=ورمـوز الابـداع مـرّّه ضايـقٍ جاشهـا
ياصاحبي بالصدر ضيـق وقهـر واحتبـاس=أهديتك جروح صـدري واهدنـي شاشهـا
وياليلة الشعـر عـذراً فـي عيونـي نُعـاس=برقـد ولالـي بالافيـونـه وخشخاشـهـا
بقفل عيوني عـن اهـل المهزلـه والطفـاس=واتـرك هـل النبـح والعظمـه وعرّاشهـا
ولو كان للشعر قاضي (كالفضيل أو إيـاس)=ماَشِفْت عين الشعر تشكـي مـن اغباشهـا

خلف الغريب
12/01/11, (09:03 AM)
سرى مزن القصيد وبالعيون اخيـال=يلوح البـرق وعيونـي تِنَاظِـرْ بـه
دموع الديمـه اللـي وَبْلَهَـا همّـال=سِقَتْ قلبٍ طعون الوقت تزهـر بـه
ويِدَرْهِمْ لِكْ جِمَلْ شِعْرِيْ وانا الْجَمّال=وحمام الشوق من صدري كفخ سر به
وتذكرتك وانا اقطع بالدروب اميال=لعينـك يالهنـوف الجـادل الذربـه
ياعقدة عمري اللـي مالهـا حـلاّل=زماني مثـل ماهـو وش تغيّـر بـه
يِطَوْل افْرَاقَنَا وانـا علـى ذا الحـال=خطاوي تايهـه فـي سِكَـةْ الغربـه
وِحِيْد:أقطع مسافات النـدم رحّـال=ونصف الأرض ضيق،ونصفها كُرْبَـهْ
رفيقي بالدروب اللّي تِغِـثْ البـال=سَهَرْ عيـنٍ يسافـر بي:واسافـر بـه
كأن الله خلق كل الـدروب اطـلال=وخلق دمعي سحاب ووجهك التربـه
مَلَلْت من الرحيل وسيـرة الترحـال=وكِرِهْ صدري طعون السيف والحربه
د خيلك وين صبحك ليل همّي طـال=تعبت اطرد وراك وما حصـل قربـه
تغيب ازْوال وتْشوف العيـون ازوال=وانا عابر سبيل ومـا انتهـى دربـه
أهدّ آمـال وابنـي بالخيـال امـال=وجسمي كِنْ دود الأرض يَنْخَرْ بـه
(بِكَيْت) ولاَ لِقَيْت من الهجير اظـلال=(ظُمَيْت)وحِلْم شَكّايْ الظُمى شِرْبَـه
تِقَطّعني سكاكيـن الفـراق اوصـال=هِنَا ضربه :هِنَا ضربه :هنـا ضربـه
بصدري للمواجـع خيـل ياخيّـال=حواجزها الضلوع اللي تكسّـر بـه
حبيبه مابقـى مـن سالفـه تنقـال=قضى كلّ الكلام اللـي نتاجـر بـه
تعالي ذاب شمعـي والغـلا القتّـال=وانا ذنب الغلا مبطـي مجاهـر بـه
تعالي قبل ما كَـفّ الزمـن تغتـال=حبيبك والليالْ السـود تَغْـدَرْ بـه
قبل سيل الرمل فوق الجسد ينهـال=وتِصِيْر آخر محطـات اللقـا غُربـه

خلف الغريب
12/01/11, (09:05 AM)
حبيبي:ياحبيبي:غاب هملـول الوصـل وَاجْدَبْـت=دخيلك بِلّ ريقي قبل أمـوت مـن الْوَلَـهْ ظامـي


وآنا اللَي يوم دِيْمَكْ يمطر ارضي مِنْ كِثِرّ:مااعْشَبْت=تِكَاثَـرْت الربيـع بواقعـي وأهديـت لاحلامـي


وفجأه غبت:ياغيث الشعـور وبالغيـاب أسهبـت=وأنـا أتخيّـل سحابـك كـل يـوم يمـرّ قدامـي


وأَبَشِّرّ فيـه قطعـان المشاعـر وانـت ماقرّبـت=على رَجَوى رذاذٍ مـن غمامـك يِسْقِـي هيامـي


وأعزي فيك نفسي لاَعَرَفْت انّك رحلـت وغبـت=وبِكَت عين الحقيقة وأضحكت لي كذبـة أوهامـي


صبرت وطال صبري وأنولد سبت وتوفى سبـت=وكمّ مِنْ سبـت راح ومـا لِقِيْتِـك داخـل أيامـي


صحيح الصبر طيّب:بس آنا من عِلِّتِـي مَاطِبْـت=صُبَرْت وما جنيت إلاّ الأسى مـن نخلـة ألامـي


أنا ضعت أفْ(غيابك) وأندمرت ورغم ذا ماتبـت=مِشَيْتَكْ درب وان طـال السفـر مَامَلّـت أقدامـي


أَعَرْف انَك خَطَايْ وذنبي الخالـد وأقـول أذنبـت=وَلاَ دوّرت توبـة ياغـلاي ومصـدر الهـامـي


تِعِبْت أذرف لك دموعي قصايـد يالغـلا وأتْعَبْـت=خـدود أوراقـي اللـي غَرِّقَتْهـا ديمـة أقلامـي


وآنا مابين سنـدان الجفـاف ومطرقـة هالكبـت=زَهَدْت بكل شـيّ وبَـرْد هَجْـرَكْ ينخرعظامـي


خطاي أنّـي أحبك:كِثـرْ مافـي غِيْبِتَـكْ عَذّبـت=عيـونٍ مـن غيابـك كـل ليلـه دمعهـا زامـي


أحبـك كثـر كُرْهِـي للفـراق وكثُرْ:مَاغَيَّبـبْـت=عن الوعـي بغيابـك ياسبايـب جرحـي الدامـي


أحبّك:وابقى احبّك واستمـرّ اهـواك لـو سَبّبْـت=شقا روحٍ لفقـدك فـي ثراهـا الشـوق متنامـي


حَسَبْت لكلّ شيء (إلاّ الُفُـراق أصْدَقْك)ماَحَسَّبْـت=ولاَ فَكّـرت فيه:وثَـارَتْ البنـدق علـى الرامـي

خلف الغريب
12/01/11, (09:06 AM)
إلى زِمَى الشوق في صدري وفاض الحنين=سيّرت لك خطوة اقدامي بِسِكَة ظمـاي
في بِرْحِةٍ موحشه مـا مرّهـا العابريـن=وَلاَ نِبَتْ في ثراها غير شوكـة عنـاي
أسير فيها وانا اجهل موضع خطاي وين=وامشي وتمشي غرابيل الليالـي معـاي
أروح وارجع من الترحال (صفر اليدين)=لاَ الما لِقِيْته:وَلاَ حَصّلْت طفلـة غـلاي
هذي هي الحال بَعْدِكْ من ثلاثة سنيـن=كنّي عمى في غيا بك وانكرتني عصـاي
مليت كثر المشي فـي سكـة التايهيـن=ومليت اعلّق على حبل الأماني رجـاي
وانتي سبب كل ضيق وكل جرحٍ دفين=تركتي الجرح في روحي واخذتـي دواي
غِبْتِيْ :وَلاَ يَومْ فَكّرْتِي عَلَـيْ تسأليـن=حتى اصبح الهاجس فراشي وحزني غَطَاي
يا للي رميتي على جسم الغـلا جمرتيـن=وحده بكفّي والاخرى حَدّرّت في حَشَاي
مِنْ كُثْر حزني عليك:أبكيت من غير:عين=الأرض ولاّ المِزِن دمعه هَطَل من سمـاي
ما قول غير الله يـردّك علـيّ وتجيـن=وإن مَا لَحَقْتِي عَلَيّه حَيّ:خوذي عـزاي
ولو الأما ني تحقّق قلت ليـت الجبيـن=يكون قبري مثل ما كان سِبَـة بـلاي
حبيبتي في ختام الهـرج لـي حاجتيـن=لا تِنْكِرِيْني وَلاَ تنسى غصونك هـواي
ولاّ فراقك شقى عُمْر وعسى اللّه يعيـن=بَطَوّل اشرب مراراته بكا سـة شقـاي

خلف الغريب
12/01/11, (09:09 AM)
ياهاجس غلاها بالصدر فضّهـا سيـره=وَلاَ تَنْبِشْ جْـرَوْحٍ لَهَـا وقـت مِنْدَمْلَـه
غرام ٍ ذِبَلْ غُصْنَه وِطَـارَتْ عَصَافِيْـره=مَحَاه الزمان ومَابِقَتْ مِنْـه لـو جُمْلَـه
وانا حبيّبي ماسـدّ فـي غيبتـه غيـره=أخطّه على سطر المقادير وارسـم لـه
شَرَبْتَه غرام :وحُب :مع شك :مع (غِيْرَه=وروحه مَعِيْ ثَمْلَه :وروحي معـه ثملـه
عَرَفْنا الْوَصُـل روضٍ تفّتـق نواويـره=تمـرّه صباحـات الغـرام وتبسّـم لـه
هوى الصبح مع صوت البلابل مساييره=ومزونٍ مخابيها علـى الخيـر مشتملـه
قبل مايجي صبـحٍ تعاقـب معاصيـره=عجاجٍ يقول العصـر الاوّل تَرَحّـمْ لـه
يجرّ الْفُـرَاقْ اللـي غَزَتْنَـا طوابيـره=تتالى جيوش الْظُلْم حَمْلَـه ورى حَمْلَـه
خذاها غنيمة حرب واظلم سمـا الديـره=وسَحَبْها على دربِ جَرَحْ سَاقَهْـا رَمْلـه
وانا واقفٍ والجـوف شبّـت دوافيـره=وعناصر عذابي في يد الوقـت مكتملـه
بَلَعْت الفراق وشرّ وقتـي قِتَـلْ خيـره=وحَمَلْتَ العذاب اللي كِرِه كَاهِلِي حَمْلـه
تداعت عظام الجسم مـن قـوّ تأثيـره=وانا في حزام الصبر قُمْت اتحيـزم لـه
لو العبـد يـدري مـا تخبّـي مقاديـره=فلا كان سرّح في فجـوج العنـا زملـه
جرى ما جرى في حكمـة الله وتدبيـره=قَرَيْنا النهايه وافتـرق شملـي وشملـه
ياهاجس غلاها كل ماجـت لهـا سيـره=تجدّ الجروح اللي بوسط الحشـا سَمْلّـه
وانا لاَ فضى كاسي من الضيق والحيره=أمدّه واقول لساقي الحـزن خـذّ وامْلـه

خلف الغريب
12/01/11, (09:15 AM)
كِذَا : فَجْأَه، رَحَلْتي مَاحَسَبْتِي لِزْعَلَـيْ ورضـأي=وانا عُمْـري أسامـي ياحِِكَايَـة حُبّـي السامـي
وانا اللي قلت لعيونك هنـا شطّي:هِنَـا مرسـأي=وتِوَقّعْتِـكْ بِعُمْـري مُرْتًبِـطْ كَالْجِلـدْ بعظامـي
ومن هَلّتْ علي مزنة وِدَاعَكْ وَامْطَـرَتْ فَرْقـأي=وانا تزهر جروحي بالضلـوع وتَـوْرِقْ ألامـي
نهار،وليـل والجـرح العتيـق مصافـحٍ يمنـأي=وسحاب الدمع في صدر الورق من ديمة اقلامـي
وإذا مافات منّي يَا تَعَبْ عُمْـرِي شبيـه الجـأي=أببدء،فيك عامـي وأختتـم بـك يالشقـا عامـي
وربي من رَحَلْتِي :تاهـت الخطوه:وتـاه الـراي=ماغير أهيم في درب الضيـاع وكَلّـتْ اقدامـي
على شَوْكِه وِطَيْت: ولو حكيت إشْوَيّ عن بَلْـوَاي=نزف جرح الكلام وكلّ حـرفٍ لاَ نِـزَل دامـي
على عوج الدورب أقْبَلْت لِكْ ظامي ووجهك ماي=وتعبت أطـرد وراك وماسِقَـى هتّانـك الظامـي
وهجير الصيف تدْمَغْ هَامِتِيْ شَمْسِه وَاجُرّ اخْطَـأي=أدوّر ظل :والصحـرا جِفَـاف وصيفهـا حَامـي
تعبت من المسير وزلّ في بير الهمـوم إرْشـأي=يبعثرنـي زمانـي وانثنـي والملـم احطـامـي
هنا،كان المطيح:ودمعة الفرقى: وصـوت النـأي=هنا مات التلاقـي والعـزا فـي كذبـة احلامـي
هنا شيخ الغياب اللي ثنى كوعـه علـى مركـأي=هنا:قلت لعيوني في حِضِـنْ بِنْـتْ السَّهَرْ(نامـي)
هنا للضيق سوق وتاجـرٍ بَاعـه علـى الشـرّاي=هنا: المرمي غلاي: وكانت ايدين الزمـن رامـي
هنا صبري تلاشى كِنّـه السكـر بكاسـة شـأي=هنا حزني تكامل واكتمـل بَـهْ شَكِـلْ هندامـي
هنا ضِعْتِي :وِضِعْت وجرّحّتْ عيني كفوف(إعْداي)=هنا ما عاد ينفـع مـع زمانـي شَـدَّة احزامـي
هنا ذاب الشعور :وطاح نجمي :وانتهى مسـراي=وهنا أخِرْ دموعي تندفـن فـي تربـة اوهامـي
هنا،بَصْرَخْ واقول إنّي دِ فَنْتَـكْ :كِـذْب يَانَسَّـأي=وهنا بَبْكِيْكْ ميّـت :والمصيببـه :قَبْـرَك ايامـي)

خلف الغريب
12/01/11, (09:24 AM)
جرح الموادع موت ياماجد الزيد=ياهو يِسَوّي فـي حياتـي سوايـا
مِنْه انْسِكَبْ بي حزن الايتام بالعيد=وظلم الملوك اللي تدوس الرعايـا
الله وَكِيْلَك ْمن رَحَل ْباشة الغيـد=عرفت معنى موت بيض النوايـا
ولابقى من يوم غاب أتْلَعْ الجيـد=إلاّ حديـث الأمكنـه والزوايـا
ومراره :وضيق:ومواجع :وتنكيد=وعينٍ بِكْت لفراق عذب السجايا
وصدرٍ من الضيقـه يجرالتناهيـد=وخضر الطعون اللي تَرَكْهَا هدايا
مليت اجرّ الرِجْل في جرهد البيد=حتى انغرز بالرجل شوك الخطايـا
صيف الوداع أنتج جفاف العناقيد=اللـي منابتهـا بِعَـوْج الحنايـا
لي عام مابلل سحـاب المواعيـد=غصني ولا جاد السمـا بالعطايـا
واللي غلاه مزوّد الوضع تعقيـد=أخشى من غيابه تبيـن الخفايـا
ومادام وقتي صقر وافراحي الصيد=ويَدّيْه مـن دم الطرايـد ملايـا
مَاظَنِتِيْ برتـاح ياماجـد الزيـد=وترتاح في جسمي جميع الخلايـا

خلف الغريب
12/01/11, (09:26 AM)
تدرين ويش اللي تـركتيه للروح =عند الـوداع اللي قَطَعْ عنق الافراح
ثورة حزن مجتـاحةٍ دولة البوح=وسحابــةٍ بـرّاقـهـا بالقهـر لاح
وسِيْرَةْ خَطَا:ليت الخطا كان مدموح=وقلبٍ شبع ضيق، وغرابيل، وجراح
وجرح الخفوق اللي بيمناك مفتوح=على بـراويـزه حمـام الشقا ناح
ودرب الجفا اللي مالنا فيه مصلوح=والخاطر اللي مـن غثا الوقت مارتاح
وسمر الطعون اللي بِدَتْ تنهش الروح=وضيٍّ هجر من غيبتك عين مصباح
وحرقه،وضيم،وضيق،وهموم،وجروح=وباقي خـرز منثور من خيط مسباح
ودمعٍ على خـدّ المقـادير مسفوح=وصدرٍ تزاحم بـه سكاكين ورماح
وعينٍ تسولف للسهـر قصـة النوح=وصرخـة يتيمٍ مـا سِمَعْتِيه لو صاح
واقسى مسـامير المواجع على الّلوح=وبـاب الفراق اللي بضبّـه ومفتاح
وغصنٍ يِشَوْحِنّه كفوف الهوا شوح=ثـاوي وِتَلْعَبْ فيـه اعاصير. وارياح
ورصاصة الرحمه من كفوف مملوح=وجثـة ذبيح،ودمع ثكـلى،وذبّـاح
وإحساس شاعر في فيافيك مطروح=ونزف الخفوق اللي بصدر الورق طاح
هذي بقايا مـا تـركتيـه للروح=روحٍ نـزعيتهـا قبل نـزع ا لارواح
على كِـذَا:ولاّ كِـذَا منك مذبوح=واللّه يِعَوّضْني بِعُمْـرٍ مِـعِـكْ راح

جلال الدرعان
12/01/11, (02:39 PM)
عـــزيزي خلف الغريب
الله يعطيك الف عافية على المشاركة الرائعة وهذا التواجد
الرائع والمميز وهذا العطاء الغير محدوُد اللى عوُدتنا عليه
بشكل يوُمي .



سلمت اناملك على ما خط قلمك
امتعتنا بروعه الكلمات الأكثر من رائعه
من روعة وابداع وتألق وتميز الشاعر
المبدع / عبدالله سماح المجلاد
ودام قلمك المتالق والمميز والمبدع
بأنتظار روائعك بكل شوق

بنت الكحيلا
12/01/11, (03:08 PM)
انتقاء في غاية الروعة والجمال

صح لسانك اخوي خلف والغريب وصح لسان الشاعر عبدالله المجلاد

والله يعطيك العافية على جلب هذه الدرر الثمينه إلينا

ابدعت وامتعت بهذه المجموعه بارك الله فيك


لك شكري وتقديري

تركي فلاح
13/01/11, (06:48 PM)
الله يبيض وجهك شاعرنا



وماقصرت على هالنقل ..




دمت بود ..




تركي فلاح

مازن الفهد
13/01/11, (09:28 PM)
قصائد ثمينه
وجدت كنز هنا
ماشاءالله تبارك الله
هذا الشعر

سالم صالح
14/01/11, (03:10 PM)
هذا الشعر الحقيقي

وانتقاء مميز من استاذ شعر استمتعت بهذة الزاوية

تقديري