نخوة عنزه

[مفرح مليحان العنزي]

قبيلة الويلان وش عندكم لي
مادام أنا دافعت دون القبيله
يوم ان كلن عن حقه يماري
وأنا وقفت برآس عيطى الطويلة
دون القبيلة والمخاليق تدري
يوم إنها شبت برآس الفتيله
ترى حزت الفزعات دام البشر حي
من قبل ماتنسف عليه النثيله
محتاجكم بالوقت والموقف السي
بالمال ماهو بالسيوف الصقيله
حاولت أوفركم لشي بنفسي
لكن جبرني مرها حنظليلة
السجن يالويلان مابعدها شي
ومن غيركم حمل الجمل يرتكيله
عناز ياعناز يالراس مالي
وقت الرخا كلن يجيب الكحيله
اللي نبي بالوقت صارت ماهي هي
حرج بها يالصاحبه يالوكيله
قبيلة الويلان وش عندكم لي
وانا الذي دافعت دون القبيلة



الشاعر / مفرح مليحان سالم العنزي

[مازن الفهد]

مفرح مليحان صح لسانك و الله يفرج كربك و يستر عليك . قصيده من القلب و ان شالله الويلان ماهم مقصرين. دعواتنا لك

[بدرفهد الجعفري]

تستاهل يامفرح مليحان

شاعر جزل ونعم الرجل


الويلان ماراح يقصرون ان شاء الله

[ماجد الغانم]

صح لساانك اخوي مفرح
والويلان معك ان شاء الله بوقفتهم ماراح يقصرون
والله يفرج كربتك وهمك

[محمد بن موسى]

مفرح مليحان

صح السانك مدد بلا عدد

والله يفرج كربتك اخوي

وقبيله عنزة مشهود لها بمثل هالمواقف وانشاء الله مايقصرون باللي يقدرون عليه

وهم اهل الفزعه والنخوه

[سالم صالح]

الشاعر / مفرح مليحان العنزي

صح السانك قصيدة جزلة من جزل


وابشر ما نخيت الا ذيابة والويلان ماراح يقصرون

ودي وتقديري

[حمد الخمعلي]

مفرح مليحاان


الله يفرج قربك وجميع كرب المسلمين0

كُن بخير

[عادل العايش]

ياهلا وغلا ويامرااحب

صح الله لساانك على هالجزله

مفرح مليحان شاعر غني عن التعريف ووقفاتك محد يجهلها والله والسبعة أنعام..

أبشر بعزك عيال عمك معك طال عمرك ولاعمره طاح الي نصاهم لو هو من اقصى العرب يالقراابه..

[رهين الماضي!]

يعطيك العافيه.....

[عبدالله عشوي]

محتاجكم بالوقت والموقف السي=
بالمال ماهو بالسيوف الصقيله
حاولت أوفركم لشي بنفسي=
لكن جبرني مرها حنظليلة
خوي
مفرح مليحان
ياليت اخوي
لووضعت لك رقم حساب
مع القصيده
كي يتمكن من يحب المساعده لك

[أبو غرام]

ابو مليحان

صح لسانك اولاً على هذه الابيات ولو انها ليست الغايه

ثانياً

كما سبقني اخي ابو سامي .. الشاعر عبدالله بن عشوي

ياليت تبين للجميع ظرفك .. واسبابك ورقم حسابك .. واهل باقين مابقيت الدنيا
وابشر بسعدك .. اخوك ابو احمد