نهته

[عبدالعزيز العدواني]

حياتنا بانتضار وساعة الإنتضار = ملل زهق وانفعال ويمكن ومحتمل

كذا كذا طاح قلب ولا رفع له شعار = متى متى مات حلم(ن) ننتضره بأمل

يابو حسين المعنى حار دمه وفار = وانا اذكرك ياعضيدي يانخيتك جمل

ماترخص اللازمه في سر والا جهار = والمعضله في لزوم الغير عندك عمل

تفتقن الجروح كبارهن والصغار = والهم توه مع آخر طارقه يشتمل

قلطت صافي معاميلي على اكبر وجار = ونفخت ناري بثوبي واحترق ما احتمل

ياكبرها يوم ادرجها حيا في وقار = والعقل من ماجراله ياعويني ثمل

والعرق ينبض قهر مكتوم وسط الحصار = والتافهه في عيوني من عذابي زمل

سلطت شر المعاني من دمار لدمار = وضربت حزمة خيالي مثل ضرب الرمل

اجمع سحاب المشاعر ويتجمع غبار = من ذكريات السعاده لين وقت(ن) صمل

الحج مايكتمل من غير رمي الجمار = وانا رميت الجمار وهقوتي يكتمل

أثر الهقاوي بعيده والليالي قصار = وعيون سود الليالي ما عماها سمل

أرخت علي الظلام وناولتني خمار = ولقحتها غصب ماودي تروح بحمل

شقيت وارجي عسى يطلع علينا نهار = وسطه يصافح ذبيح الشوق لم الشمل

[بدرفهد الجعفري]

شاعر كبيره وحضوره مميز

صح لسانك

[خلف الغريب]

شقيت وارجي عسى يطلع علينا نهـار
وسطه يصافح ذبيح الشوق لم الشمل


العزيز عبدالعزيز ..

الف صح لسانك ولا هان هذا البوح الجميل يا عبدالعزيز وكعادتك رائع ولا يستغرب معك هذا الابداع ..

شكرا لك مرة اخرى ..

[عادل العايش]

عبدالعزيز العدواني

الله الله عليك ياشاعرنا

انت دائماً متألق

صح الله لسانك

وتسلم يمينك يالذيب..

[سليمان الجعفري]

الاخ الفاضل / عبدالعزيز

الف صح لسانك ولا هان هذا البوح الجميل

و رائع ولا يستغرب منك هذا الابداع الله يعطيك الف عافيه

تقبل مروري

[سليمان مفضي العنزي]

ابيات يقف خلفها شاعر كبير لاشك

صح لسانك