لغز تحدي والجائزه بالداخل

[سليمان مفضي العنزي]

السلام عليكم

اتمنى قبول هذه المصافحه بهذا اللغز الحصري لشبكة ويلان العربيه

وسوف اضع جائزه رمزيه لمن يتوصل لحل اللغز اول واحد

وهي عباره عن بطاقة شحن بقيمة 50 ريال لسهولة التوصيل وماهي الا جائزه رمزيه واعتذر عن التقصير وسوف يتم ارسالها للفائز برساله خاصه بالتنسيق مع الاداره.

كما اعتذر من الاداره في تقديمها وان كنت تجاوزت اي قوانين فانا مستعد لسحبها وشكرا لكم جميعا


وهذا هو اللغز وهو من تاليفي:




نشدك عن رجلا اخوانه كثيرين = كبيرهم من غير اسم وعلامه
شغله يفرق دائما بين الاخوين = ولاحدٍ على هذا العمل يوم لامه
متزوجاته كل الايام ثنتين = تناوبنه وانهكن له عظامه




اخوكم سليمان مفضي العنزي

[ريماس]

هين ياسليمان

ماتدري انه هنا في بنت مايفوتها لغز وانت من دخلت حاط جائزه <<< امحق بنت .

الله يقويك بس لاتنسى ابيها شحن زين <<<انتي حليه اول .


اممممم تفكر امممممم تفكر اممممم تفكر

واخيرا لقيته

هذا طال عمرك هو "الجوكر" الموجود في ورقة اللعب

[ريماس]

ياربي من شفقتي على حل اللغز نسيت اقول لك شكرا على اللغز والجائزه ياسليمان

آسفه وربي بس عاد العجله شينه

شكرا لك على هذه المبادره الحلوه انا احب افكر في الالغاز وبالزود ياصار في جوائز

[هندي المقبل]

الاخ سليمان العنزي

بيض الله وجهك وشاكرين لك هذه المبادره وهي دليل على حرصك واهتمامك

وماعسانا ان نقول الا شكرا لك .

ودعما لهذه الفكره سوف نضيف للعضو الفائز 100 نقطه في تقييمه

[عبدالله مقبل]

هلا بك اخوي سليمان

عندي رمعه ولاني متوكد لكن من باب المشاركة

اقول انه حرف الالف

اخوانه الحروف

واللي متزوجاته اللي انهكن عظامه الهمزة اللي فوق الالف والهمزة اللي تحت الالف

وهو يفرق بين كل حروف وحرف ايظا

[بدرفهد الجعفري]

مشكور ياسليمان

اذا ماكن هو حرف "أ" كما قال اخي عبدالله مقبل

فانا رمعتي هي "ابراج الكويت" والكبير هوالاوسط

[سليمان مفضي العنزي]

الاخت ريماس

اهلا بك وكان ودي والله ان جوابك يكون صحيح على هذا الحماس

لكن للأسف ماهو هو .

---

الاستاذ هندي المقبل الله يبيض وجهك ونتمنى ان نقدم ولو جزء بسيط نظير ماقدمتموه انتم .

---
الاستاذ عبدالله مقبل

ياهلا بالحضور

رمعتك جده طيبه لكن للأسف ماهو هو

حاول مره اخرى اتوقع ان راح تجيبه.

---

الاستاذ بدر الجعفري

للأسف ماهو هو الحل حاول مره اخرى

--

مازال اللغز يبحث عن حل

[نافع عيد الجديد]

ياهلابك والله حيه
يثبت اللغز
وما زال التفكر جاري

[نافع عيد الجديد]

الاجابه من واحد عندي ....يقول : حرف الألف لام ياء

[سليمان مفضي العنزي]

الاستاذ نافع عيد الجديد

شكرا لك على التثبيت

اما عن الرمعه فعلى الرغم من اني لم افهمها الا انها ليس ت الحل مع الاسف .

ننتظر حلالة الالغاز ؟!

[خلف الغريب]

هلا اخوي سليمان وشكرا على هاللغز الجزل والتفكير جاري ..

الاخ نافع .. حطيت الرمعة العميا باسم واحد عندك يا الظالم .. مالك عن باص من جنبها بس شغل المكيف لاستقبال الركاب ..

جاري التفكير ويا ليت يا اخوي سليمان تزودنا بألغاز ترا لنا مدة ما تهاوشنا هنا على الرمعات ..


تحياتي لك ولجمال حضورك..

[سالم العنزي]

والله ياسليمان دخلت هنا وفحطت شوي لكن والله مالقيت له رمعه

خلني اتوكد من الرمعه لا اروح بالباص ههههه

جاري التفكير .. وابي استعين بعملاء خارجيين لعل وعسى تحصل البطاقه ههه

شكرا

[عبدالله مقبل]

نقول السطر ياأخ سليمان

[سليمان مفضي العنزي]

حيالله الشاعر الكبير خلف الغريب

والله يالطيب انا نيتي زينه ولا ادري وش الموضوع لكن الرجال حاول وماقصر

اشكرك على المرور فمجرد تفكيرك في لغزي نجاح لك

--------------------

الاخ سالم العنزي

ان شاء الله التفكير يؤدي الي نتيجه شاكر لك .

-----------------

عبدالله مقبل والله رمعتك قويه واكيد مهتم بحل الالغاز

لكن للأسف ماهو هو .

حاول مره اخرى

[شجاع النومسي]

يا هلا ويا مرحبا أخوي سليمان

حياك الله في شبكة ويلان حيث يلتقي النخبة

عندي رمعة وأتمنى تكون صحيحة

هي العروة والشظاظ

دمت بخير

[سليمان مفضي العنزي]

الله يبارك فيك ياشجاع

وشكرا لك على هذه الرمعه التي اعادت لنا بعض الكلمات القديمه من تراثنا

لكن للأسف ليس هي الحل !

حاول مره اخرى

[سعود المسعودي]

الاخ سليمان العنزي
بيض الله وجهك وشاكرين لك هذه المبادره وهي دليل على حرصك واهتمامك


حضور جميل وطرح جزيل وتستاهل التقييم43 نقطه مني الله يقويك

وحياك الله في منتداك

[عبدالعزيز السعود]

رمعتي :

الكوبون اللي يوضع بين ورقتين ,,

[أبو غرام]

السلام عليكم ورحمة الله وبركاته

هذا اللغز سبب .. ضجه اعلاميه كبيره

وصار الكل يبي يشارك .. مو للخمسين ^_^

ولكن لحل التحدي

لكن انا مشاركتي قبل ارمع .. عل الغير يفكر معي بها

انه شيء مربوط بين ثنتين وقاعدات يديرنه فوق تحت او زي كذا

وهو يفرق به بين الاشياء .. وهذا طبيعة عمله
مثل رمعة اخوي عبدالعزيز او مثل السير اللي بين بكرتين

وهلمن جر

ولازال الفكر جاي

ورمعتي كبدايه

الخيط .. بين المكرتين اللي في المكينه ؟ هاه وش رايك يا صاحب اللغز

^.^

واحلا مافي هذا اللغز .. عدم وجود بااااااااااص

[**masha3el **]

جااااااااااري التفكير

يمكن الحركات الاملائيه على الحروووف
دام مافيه باااص نرم براحتنا
ويطيك الف عافيه

[سالم صالح]

الاخ / سليمان العنزي


الله يعطيك العافية لغز جامد الصراحة ومليان


جاري التفكير والياصار مافيه باص ماعلينا نبي نرمع وحنا مرتاحين كسر ظهورنا السواق


رمعة اولية ( العلامات ) مثل ( النقطة - والفاصلة -والشرطة )

[سليمان مفضي العنزي]

في البدايه اعتذر من الشاعر خلف الغريب للخطأ الاملائي الغير مقصود في ردي عليه

اشكرك على المرور فمجرد تفكيرك في لغزي نجاح لك
والصح هم " له" فهذا هو الصحيح مجرد تفكيرك ياخلف في هذا اللغز نجاح له اشكرك وآسف مره اخرى .

--------------------

الاستاذ سعود المسعودي شكرا على المرور والتقييم الله يبيض وجهك

------------------

الاستاذ عبدالعزيز السعود

مالك لوا الرمعه طيبه بس ماهي هو .

----------------

الاستاذ جايز المليحان

اشكرك على كلامك وفعلا ليس الهدف الخمسين ابدا واعرف انها لاتعني شيء للجميع ولكنها مجرد شيء رمزي .

اما عن توضيحك فهو غير دقيق!! وسوف اكتب توضيح في اخر الرد .

وبالنسبه لرمعتك مالك لوا.

وبعدين انا اشوف الربع مستانسين ان مافي باص ويرمعون

مع اني مدري وش سالفة الباص لكن ولايهمكم يالربع بس ارمعوا مافي باص ولا ددسن بعد هههههههه.

--------------------
اختي مشاعل

مالك لوا غير صحيح .

-------------------

الاستاذ سالم صالح

ابشرك مافي باص خذ راحتك بس

اما الرمعه فخطأ

حاول مره اخرى .
-----------------------

اخواني الكرام .

انا عملت هذا اللغز وانا ارد على احد المواضيع في المنتدى !!! فكروا زين .

وبعدين تراكم كل يوم تشوفونه وانا متاكد من هالشيء ولاتكتفون بشوفه بل اتحدى ان لم تكونوا جميعا استخدمتوه!!! فكروا زين

[عبدالعزيز السعود]

رمعه ثانيه وش رايك بـ(( القـــلم )) وبالاخص قلم الرصاص "

[عاشق المعالي]

اخوي سليمان

عندي رمعه قديمه جدا مدري والله عنها

اقول " قطب بيت الشعر"

للتوضيح هو عصاء صغيره توضع بين واسط بيت الشعر والشقاق .

[أبو غرام]

اجل الله يعينا

نسوي بحث حول كل مشاركاتك

المخ دخّن .. ومابقى الا البحث

هههههههههههه

[أبو غرام]

نشدك عن رجلا اخوانه كثيريـن
كبيرهـم مــن غـيـر اســم وعـلامـه
شغله يفـرق دائمـا بيـن الاخويـن
ولاحدٍ على هذا العمل يوم لامه
مـتـزوجـاتــه كـــــل الايـــــام ثـنـتـيــن
تـنـاوبـنــه وانـهــكــن لـــــه عــظــامــه

اوجع راسي هاللغز

اذا ماهو الرقم التسلسلي اللي بالبطاقه
هو يفرق بين الاخوان .. ولا احد يلومه
ويمسكنه يدينك مره يمين ومره شمال

ولو اني حاس اني من جنبها بس يالله

عسى يكون على الاقل مرماع طيب

[عبدالله مقبل]

انا اقول زر المسافة اللي بالكيبورد للكمبيوتر هو كبيرهم

والحل هو ازرار الكيبورد

[سليمان مفضي العنزي]

اشكر كل من حاولوا ايجاد حل للغز واقول لكم حظا اوفر

-------------

واقول للأخ عبد الله مقبل الف الف مبروووك انت الفائز بالتحدي وصح لسانك انا كان عندي احساس كبير انه انت اللي راح تحله نظرا لقوة رمعاتك.

حلك صحيح نعم هو "زر المسافه الموجود في لوحة المفاتيح ".

هو اكبر زر بين الازرار وكل الازرار عليهم كتابه الا هو ماعليه اي علامه في اغلب لوحات المفاتيح ان لم يكن كلها . واخوانه هم الازرار الاخرى .

ويفرق دائما بين اي حرفين اذا تم الضغط عليه ومعروف ان اصبعين " الابهام" هم من يقوموا بالضغط على زر المسافه .

اتمنى ان اللغز متوافق لحله 100% واتقبل اي نقد او ملاحظه .

-------------
الاداره الكريمه انا لا استطيع ارسال رسائل خاصه حاليا وارغب في ارسال بطاقة الشحن الي الاخ عبدالله مقبل ياليت تشوفون لي طريقه او تفتحون لي الرسائل الخاصه

وشكرا للجميع

[عبدالعزيز السعود]

بطل ياابو زياد وتســـــتاهل كل خير ..:thumbs_up:

الاخ سليمان بيض الله وجهك ولغزك وافي يالذيب ..

وننتظــر منك الغاز قادمة فلا تبخل علينا ..

تحياتي لك ..http://www.shmaaly.com/vb/images/smilies/i.gif

[عبدالله مقبل]

اشكر كل من حاولوا ايجاد حل للغز واقول لكم حظا اوفر

-------------

واقول للأخ عبد الله مقبل الف الف مبروووك انت الفائز بالتحدي وصح لسانك انا كان عندي احساس كبير انه انت اللي راح تحله نظرا لقوة رمعاتك.

حلك صحيح نعم هو "زر المسافه الموجود في لوحة المفاتيح ".

هو اكبر زر بين الازرار وكل الازرار عليهم كتابه الا هو ماعليه اي علامه في اغلب لوحات المفاتيح ان لم يكن كلها . واخوانه هم الازرار الاخرى .

ويفرق دائما بين اي حرفين اذا تم الضغط عليه ومعروف ان اصبعين " الابهام" هم من يقوموا بالضغط على زر المسافه .

اتمنى ان اللغز متوافق لحله 100% واتقبل اي نقد او ملاحظه .

-------------
الاداره الكريمه انا لا استطيع ارسال رسائل خاصه حاليا وارغب في ارسال بطاقة الشحن الي الاخ عبدالله مقبل ياليت تشوفون لي طريقه او تفتحون لي الرسائل الخاصه

وشكرا للجميع


صح بدنك أخوي سليمان

كان الغرض هو المشاركة فقط

وبالنسبة للجائزة والله والله ماتجيني وان شاء الله إنك رجال تقدر الحلف بالله

صدقني اخوي وافي واعتبرها وصلتني فقط من مجرد كلامك الطيب ومشاركة بقية الأعضاء

لكن ماراح اخليك تتعبنا كذ بلغزك لابد مانتعبك بلغز مثله هههه

[عبدالله مقبل]

بطل ياابو زياد وتســـــتاهل كل خير ..:thumbs_up:


الاخ سليمان بيض الله وجهك ولغزك وافي يالذيب ..

وننتظــر منك الغاز قادمة فلا تبخل علينا ..


تحياتي لك ..http://www.shmaaly.com/vb/images/smilies/i.gif



ماعليك زود ياابو سعود

انت لحالك مدرسة في حلول الالغاز

[سليمان مفضي العنزي]

الاخ العزيز عبدالله مقبل

نعم اقدر الحلف بالله وانتهى الموضوع وان كنت اتمنى انك لم تقوم بهذا العمل فأنا اعرف جيدا ان مافيه احد شارك لأجل الجائزه ولكني وضعتها رمزيه فقط وتمنيت لو تركت الامر يستمر كما هو افضل للمنتدى وافضل لنا جميعا .

على كل بيض الله وجهك وصح لسانك وانا مستعد ان شاء الله لأي لغز يطرح هنا فأنا اهوى الالغاز وان كنت ضعيف شوي في حلهن ..

تحية ود وتقدير للجميع

[فايز الفرحان]

ياطول العمر

النصايب

[بدرفهد الجعفري]

ياطول العمر

النصايب


ياطويل العمر يابو فرحان

الرجال حلوا اللغز وحله عبدالله مقبل من زمان

راجع المشاركات السابقه وتلقى الحل

رحمتك والله مابيك تفكر لان هاللغز فجر راسي من كثر مافكرت به وهذا اعتراف مني حتى لو مارديت ههههههه