العمار والخراب ....

[سلامة الجعفري]

سلام تسليمة اللي عاد عقب الغياب = الغيبة اللي يالولا الظرف مااغيبها
الله يازين العمار الله ياشين الخراب = الدار به واحد يسعى لتخريبها

[صالح السالم]

يا مرحبا بك تراحيب المطر والسحاب=اصحابنا الغاليه واجب نهلي بها
والدار لو رامها حاسد وودا وجاب=تبقى عزيزه تحت حشمة معازيبها

[سلامة الجعفري]

دام البقا وانت ياصالح عزيز الجناب = لكن تلحقك شرهه وانت تدري بها
انته وماجد رحلتو تشعبون الركاب = ودياركم غثرب المخرب مشاريبها

[صالح السالم]

الذيب يا صاحبي وده بصوت الذياب=والدار لأخلت من العربان مالي بها
عودت رجلي على ممشى الدروب الصعاب=وان عاد وسم الحياء للدار ناتي بها

[سلامة الجعفري]

اصرف ذهب والخطا ماهو بمثل الصواب = ياللي تميز بمخطيها وبمصيبها
انا ادري انك شجيع وفاللقا ماتهاب = لو انك احيان تنقلها وتقفي بها

[سلامة الجعفري]

اذن العصر ياصالح استاذنك نكمل بالليل ان شاء الله

[صالح السالم]

اصرف ذهب والكلام الصعب يبي الجواب=والا انت كل العلوم الطيب تحريبها
لا شك لا شفت من ينعق نعيق الغراب=تركت كل الديار اللي يغني بها

[سلامة الجعفري]

ماني بزايدك لو ظني بموقفك خاب = يوم السوالف لفتني مع مناديبها
قالو لي ان الهنوف اللي تحط الخضاب = سبيت وعينك مع العالم تراعي بها

[صالح السالم]

من قال لك ما يرد العلم يابو الشباب=خل السوالف لجهالٍ تهذريبها
من دونها في مواقفنا نبيع الرقاب=ندوس الاخطار ما نحسب عواقيبها

[سلامة الجعفري]

بيت الفقر من يدور به طعام وشراب = يبطي ولاحققت نفسه مطاليبها
انته تشوف الغدير وتحسب انه سراب = ولا انت تجحد حقايق بين ٍ غيبها

[صالح السالم]

العالم اللي على المخطي تحد الحراب=ناسٍ تعد العيوب ولا تعرف عيبها
العام تتبع مناديبه ذهاب وأياب=واليوم تنكر على العالم مراقيبها

[سلامة الجعفري]

من بعدها ماني بملحقك لوم وعتاب = ياجاهل ٍ بالصلاة اللي تصلي بها
قص الجرر واحسب لبعض السوالف حساب = ماباقي الا على شانك نبدي بها

[عبدالعزيز السعود]

سلامة الجعفري ..

صالح السالم ..

ماشاء الله عليكم ..

وصح السنتكم ..

متابع بشغف ..

[بنت الكحيلا]

اخواني سلامة الجعفري صالح السالم

صحة السنتكم ابدعتم الله يعطيكم العافية

لكم اجمل التحايا والتقدير

[صالح السالم]

القصد واضح ولا تفتح على النفس باب=فكر بنفسك عن الناس وعذاريبها
والجادل اللي تقول انه سباها العقاب=العام بادت حيولك وانت تحكي بها

[صالح السالم]

عبدالعزيز السعود

بنت الكحيلا

صحت ابدانكم

اشكركم على المرور والمتابعه

[صالح السالم]

اخوي سلامه صح السانك ... وبيض الله وجهك
سرى الليل استاذك ولي الشرف في اللعب مع شاعر بحجمك

الختام عندك

تقبل شكري وتقديري

[سلامة الجعفري]

على العموم الله يسلمك والقاف شاب = واقول واشيب عيني منك واشيبها
اسهرتني وانت عينك مغتيشها الضباب = اثر الليالي مافادت بك تجاريبها

[سلامة الجعفري]

تصبح على خير ياصالح

وانا متشرف بلقائك


واشكر جميع المتابعين

بدون تحديد كلهم لهم الشكر


والى اللقاء

[نافع عيد الجديد]

الله الله ابدعتم والله يعطيكم العافيه

اسجل اعجابي

تحياتي لكم

[عمر الطويلعي]

الله الله ,, صح لسانك يا سلامة , وصح لسانك يا صالح

ويني عن هالطاروق من أوّله :)..

ما قصرتوا وصحت ألسنتكم يا مبدعين