نتائج مسابقة شبكة ويلان الكبرى ( مسابقة الشعراء) [الأرشيف] - °~*¤®§(§ شبـــكة ويــلان العـربـيـه §)§®¤*~ˆ°

سعد النفج

16/05/09, (01:03 PM)

بسم الله الرحمن الرحيم

الحمدلله رب العالمين الصلاة والسلام على خاتم الانبياء والمرسلين
نبينا محمد وعلى آله وصحبه اجمعين ..
وبعد :

اخواني و اخواتي في ..

*^@’ ( شبكة ويلان العربية ) ’@^*

السلام عليكم ورحمة الله وبركاته ..

في البداية نحمدالله العلي القدير الذي أعاد لنا الإبتسامه و أثلج صدورنا بشفاء صاحب السمو الملكي الأمير / سلطان بن عبدالعزيز آل سعود..ولي العهد نائب رئيس مجلس الوزراء وزير الدفاع والطيران والمفتش العام.. حفظه الله.. و أدام عليه الصحة و العافيه..
و كان لنا عظيم الشرف بالتعبير عن فرحتنا بهذه المناسبة و إقامة مسابقة تعتبر الأولى من نوعها في المنتديات الالكترونية..
فبإسمكم نشكر الاستاذ / هندي المقبل على جهوده و السعي نحو إنجاح هذه المسابقة و الرقي بالمنتدى و تقديم ما يملك في سبيل النهوض بهذا الصرح الرائع..
و نشكر اللجنة الموقره على عظيم جهودهم و على تقييمهم للنصوص المميزه واجتهادهم و نشكر إدارة المنتدى على الثقة الممنوحة لهم فهم أهل لها.. اللجنة كانت مكونة من اساتذة في الشعر هم /
الشاعر / محمد المقبل
الشاعر / صالح الضويحي
الشاعر و الراوي / فواز الغسلان
الشاعر / خلف الغريب

و نشكر كل من شارك في هذه المسابقة و أن الهدف الحقيقي هو التنافس الشريف و شعراءنا اثبتوا انهم مميزون في طرحهم و في أفكارهم و في ابداعهم و هم السبب الحقيقي في نجاح المسابقة. هم جميعاً متألقين و نصوصهم تستحق الثناء لا حرمنا الله ابداعاتهم.
و كما وعدناكم .. سيتم نشر مشاركات الفائزين بالمراكز العشر الأولى بالترتيب مع إعلان الدرجات التي حصلوا عليها علماً بأن الدرجات من ( 40 درجة ) و نعتذر لمن لم ننشر مشاركته و ذلك لكثرة المشاركات في المسابقة..
آملين من الله سبحانه و تعالى أن يوفق الجميع لما يحب و يرضى..

سعد النفج

16/05/09, (01:07 PM)

الشاعر / سلامه الجعفري

ابرقي ياغيوم الشعر لجي رعود = واستهلي على صدري بماك القراح
كم وعيني تخيلك.. ماصدقتي وعود = كل ماشفتك اقبلتي غدت بك رياح
لين ساقك كريم ٍ مالجوده حدود = وامتلى كل عرقْ من المعاني وساح
مرحبا مرحبا مع هبهبة كل نود = يابيوت ٍ تزارق مثل زرق الرماح
عقب ماذاع علم ٍ به تطيب الكبود = روّح الضيق عــنـّـا واقبل الانشراح
قالوا الله شفى رمز الفخر والصمود = والي العهد سلطان الظفر والكفاح
علم ٍ ارض الوطن منه اكتست بالورود = وازهرت من فرحها واجمل العطر فاح
ابو خالد ذرى اللي ذاق حر اللهود = كل ضايق ليا مـنّـه نصاه استراح
ابلج ٍ يبتسم وجهه لشوف الوفود = باسط يديه تفداه اليدين الشحاح
يوم غيره سجن نفسه بحب النقود = وانهزم مع هوى نفسه وللسد باح
هو خذا كل جود وطـوّقه بالقيود = وقال يالبخل روح ياطليق السراح
ماتـعّـقد حجاجه والزمان امعقود = مشرق ٍ نور وجهه مثل نور الصباح
سيد الفعل الاول في جميع البنود = بالوفا والمراجل والكرم والسماح
لــنّه بفطرته دايم يحب الصعود = واعتلى مثل نجم ٍ في فضا الكون لاح
معتلي مانزل راسه لغير السجود = او علشان يرفع من تـعـثـّـر وطاح
ويش اوّصف برجل ٍ مايبي له شهود = مادحه فعله الطيب بدون امتداح
رجلْ مثل الرجال الا ان بالفعل زود = والفعول الشهيره ماتجي بالسلاح
منحة ٍ جاريه من عند رب الوجود = من فقدها صعيبه ماتجيه امتناح
حطها الله بمثل الليث عرب الجدود = نسل من حازوا الطوله طيور الفلاح
يالله احمدك ياللي عالم ٍ بالسدود = يوم سلطان طاب وعــنـّـه الضر زاح
جعل عمره مديد وجعل عزه يزود = واحفظه يالولي من حيث وجّــه وراح
يكمل سرورنا لاقيل بكره يعود = ثم تفرح به دياره وتلبس وشاح
والقصايد بوصف شعورنا لو تجود = ماتوّضح عشر صدق القلوب الصحاح

حصل على 35.5 درجة

سعد النفج

16/05/09, (01:10 PM)

الشاعر / عبدالله الدغيثر

تباشري يا المملكة قام سلطان =تباشري به يا قصور اليمامة
ويا نجد برق(ن) لاح في عرض الامزان=تباشري به يوم ركّب غمامة
واسترسلي في شيل عذبات الألحان=الحمد للي قوّمه بالسلامة
هذا ولد من حط للمجد عنوان=سليل من اسس ركون الزعامة
سلامته عيد(ن) على ارض الوطن حان=والحزن راح وبدد الله ظلامه
ونور الفرح شعشع على كل الاوطان=شرق وشمال وغرب واقصى تهامة
منتب رخيص(ن) يا سلايل كحيلان=غالي ولك قدر(ن) رفيع(ن) مقامه
انت السخاء والجود يا ذرب الأيمان=جودك على خد الزمن حط شامة
يشوفه المبصر ومن كان عميان=ويدري به اللي دوب كمّل فطامه
وصيتك تعدى الكون من غير بهتان=لك هامة بالعز ياويّ هامة
واسمك الى من مر تحتار الاذهان=يفرض على كل الشعوب احترامه
يا فزعة اللي هانه الوقت وانهان=يا عون من هو جاير الوقت ضامه
يا درعنا عقب الولي عالي الشان=يا حزام من قطّع زمانه حزامه
الشعب يرقب طلّتك حيل شفقان=يا من يروم المجد والمجد رامه
والشكر للي فارض(ن) خمس الأركان=له الفضل في قومتك بالسلامة
الله يحفظك من صواديف الازمان=لاباس يا راعي الوفاء والشهامه

حصل على 34 درجة

سعد النفج

16/05/09, (01:13 PM)

الشاعر / مرزوق بن نومان

الفضل للي بالسما يرزق الطير=مرس الجبال الشامخات الرواسي
بالمملكه حنا نسوق التباشير=في عودة الرجل الحكيم السياسي
مبسوط من حولي ونا فرحتي غير=تجلب لي الجو الرهيب الحماسي
حبيت اسوي لنبساطي تقارير=من دم شرياني ومن صنع راسي
طاب القصيد وطاب جو التعابير=والشعر نبعٍ نابعِ من احساسي
من فرحتي يمشي معي دون تفكير=صحصح معي بعد النكد والعماسي
عودة ولي العهد من دون تأخير=فرحه تحطم كل رقمٍ قياسي
افراح ماتترك للأحزان تأثير=مثل الشروق اللي يزيل الدماسي
افرح بعودة سيدي يالمناعير=اللي يشيل الحمل لو كان قاسي
وقول دمت بخير ياقمة الخير=ياسيدي سلطان ياتاج راسي
الله يجيرك من صدوف المقادير=ياعل ثوب العافيه لك لباسي
ياقايد الجيش السعودي ويامير=بالأسم والفعل الاصيل الاساسي
هيبتك لاعنتر ولا سالم الزير=يهتز قدامك شموخ القواسي
يمناك يمنا ماتحسب المخاسير=معدن ذهب ماهو بمعدن نحاسي
لو اقدر اصدر عن مزاياك تصوير=لصدر كتاب بكل عامٍ دراسي
بعماق قلبي لك معزه وتقدير=وكرسيك بعيوني زعيم الكراسي
وسلامتك ليه من الحزن تحرير=وفرحة رجوعك سيدي ماتقاسي
وقول دمت بخير ياقمة الخير=ياسيدي سلطان ياتاج راسي

حصل على 33.5 درجة

سعد النفج

16/05/09, (01:15 PM)

الشاعره / فاطمة الجعفري

لايالمرض مافيك لاحيله ولا ذرة ملام = ولا عليك حساب للي صار منك ومابدر
والله لو ماهو قدر مكتوب من رب الانام = ان كان قلنا اللي حصل بهتان او ظلم وغدر
لايالمرض مافيك لاغيره ولا فيك احترام = استغفر الله لا اعتراض بما يخبيه القدر
لكن مدام الصمت مل ّ وهاجر حدود الكلام =وحنا نحاول من شهر ماضي نبي نمسك خبر
سلطان ياسلطان بن عبدالعزيز ابن الامام = سلامتك ياللي ملكت قلوبنا حب وقدر
سلامتك ياشيخنا الضرغام يانسل الكرام = سلامتك يابو اليتيم اللي شكى جوع وفقر
سلامتك يابو الكرم ياحامي البيت الحرام = ياقايد الجيش العتيد ان دق ناقوس الخطر
سلامتك يادرع عبدالله اذا اشتد الزحام = في ساعة ٍ تصعب على المؤمن ويشتد الظهر
سلامتك ياللي غدا خيرك مثل وبل الغمام = ياللي شبيهك من رجال الخير ماقل وندر
ياصاحب الوجه البشوش اللي اكتسى ود وسلام = ياللي سكن قلبك تواضع ماسكن قلبك كبر
من غبت كن الثانيه ساعات والساعات عام = وجميعنا ننظر خبر رجعتك من فارغ صبر
ياسيدي ارض الوطن تبكيك في ليل وجهام = ولو قستها شبر شبر شبر شبر شبر شبر
من سد مأرب والمسافه تتجه لحدود شام = ومن غرب طيبه لين ماتاصل الى شرق الخبر
لها ثلاث شهور ماتضحك ولاذاقت منام = ولانبت في ارضها خضار او جاها مطر
الين ماجانا خبر سلامتك يابن الامام = وعشنا فرح من بعد ماعشنا على ضيقة صدر

حصلت على 33 درجة

سعد النفج

16/05/09, (01:18 PM)

الشاعر / شاعر البيتين

الحمدلله خالقي والثناء له = له أنحني شكر ٍ وتعظيم وإيمان
ماخاب من يدعيه جلا جلاله = فرح قلوب ٍ همها شوف سلطان
شيوخ تدعي له وطفل ٍ دعاله = وتدعي له أم ٍ عمها غيث الأحسان
حماه رب الكون والشر زاله = طهور ياأمير ٍ للمجاد عنوان
عسى لباس العافيه دوم فاله = وجعل المرض تكفير ذنب ٍ وغفران
كل ٍ ترقب جيته وأحتفاله = عيد ٍ علينا شوفته عالي الشان
بقلوبنا كل الغلا والوفا له = ترخص له الأرواح شيب ٍ وشبان
نشتاق له غرب وجنوب وشماله = وشعب ٍ بشرق المملكه حيل ولهان
يأمير ياأمير السعد والشكاله = أنته ذرانا يوم زوغات الأذهان
أن جارت حمول الزمان أرتكاله = حلحيل حلال الصعايب بليهان
حنا لبونا كل أبونا حلاله = تامر علينا يابوخالد كحيلان
يامكرم الأيتام من حر ماله = خيرك على الأجواد حضر ٍ وبدوان
تنفق يمينه دون تدري شماله = ماظنتي يوجد مثل جوده أنسان
بالجود نال المرتبه والزماله = للخير فعال ٍ وللعدل ميزان
سلطان من بين الخلايق لحاله = تنشر له البيضاء على راس مابان
يالله طلبتك وأنت ربي وأساله = تحفظ لنا سلطان من جور الأزمان
في منتدى الويلان صغت الرساله = رسالتي وأرسلتها عبر ويلان

حصل على 31.5 درجة

سعد النفج

16/05/09, (01:21 PM)

الشاعر / نافع عيد الجديد

ياطيرغرد حان وقت التعابير=شوف القلوب من الفرح نورها بان
غرد وهز الريش بالجوياطير=غيرك ترى ياطير من غيرجنحان
شوف الفياض يجاوبن النواوير=وجاوب معاها الشيح في عذب الالحان
وشعب السعوديه يزف التباشير=بشرى فرح ماقدروهابالاثمان
ماللحزن بقلوبنا اي تبرير=صار الفرح سلطان باسباب سلطان
زال المرض عن سيدي منبع الخير=وعم الفرح كل المداين والاوطان
في غيبتك ياسيدي حالنا غير=صار الحزن بقلوبنا دوم عنوان
لانك ذرانا عن هبوب المعاصير=وانت الفرح تقضي على كل الاحزان
وانت الكرم من غير حد ومعايير=مدت يمينك مزن بالخير هتان
وانت الشجاع اللي يقود الطوابير=شانك كبيران كان عدوا هل الشان
ياحاتم الطائي وياسالم الزير=لاوالله الا ما خذوا ثمن الاثمان
يابن الملوك اللي خذوا كل تقدير=ميزانهم يرجح على كل ميزان
ولي عهد مسطر المجد تسطير=عبدالله اللي واضح لكل الاعيان
له هيبةً مثل السيوف البواتير=عزالوطن والدين للحق برهان
خادم بيوت الله طويل الاشابير=ثبت قواعدهاعلى عز وايمان
وفي شوفتك نفرح ونرتاح يامير=وطريف يرسل بالتهاني لنجران
وحنا ضمايا كلنا صغيروكبير=وعطشى لشوفك ياهماليل الامزان
طهور ماصابك عسى ايامك بخير=اجروثواباً يوم تقسيم الاوزان

حصل على 30 درجة

سعد النفج

16/05/09, (01:23 PM)

الشاعر / منصور الرويلي

يامرحبـا اعـداد همـال الامطـار=ومية هـلا فاحـت ورود ونواويـر
الحمد للـي عالـمً سـر واجهـار=اللـي لنـا ردك وعافـاك يامـيـر
سلامتك يامير .. يانسـل الاحـرار= ياعل ماصابك مثوبه وتكفيـر
قدرك كبير وللوطن مخلصً بار = قول وفعل ماهي كتابه وتصوير
بسم الوطن والشعب أكبار واصغـار= نهديـك باقـة ورد للحـب تعبيـر
لك في قلوب الناس قيمه ومقدار = كثر كرمك وكثر ماتفعل الخير
لك صورةٍ بين الخواطـر والانظـار= مامثلها فـي كـل معنـى وتفسيـر
ياسيدي ياسْيد سادات الاخيار = ياظلنـا عـن حاميـات الهواجيـر
أبوك قبلك ناصـر الديـن والـدار= بالسيف حتى نـوّر الحـق تنويـر
عبدالعزيز اللي قمع كيـد الاشـرار=وطهّر بواديها عن الشـرك تطهيّـر
سيف العدالـه دايـم الـدوم بتـار=ومن عال دلته السيـوف البواتيـر
نبيع من دون الوطن غال الاعمـار= وعزومنا تسبق هبوب التباشير
وانت الامير الصيرمي وافي الاشبار= في كل موقف لك مكانـه وتقديـر
يامير طيبك عـم سبعـات الاقطـار= وسجلت من فعل البواسـل اساطيـر
يامير ماللجود غيـر الكـرم جـار= وتشهد على طيبك ضيوف ومساييـر
يامير لك ظلً مثـل ضلـع سنجـار = أقبل من الصادق بصدق التعابير
مافيه شاعـر يذكـرك دون يحتـار=والشعر مهما يمدحك فيـه تقصيـر
من كثر مايأخذ بك المـدح مشـوار= يقطع بوصفـك عاليـات المشاويـر
انته ورثت المرجله مثـل الاحرار= يامُنتهى الشكوى .. كعام المناعيـر
اللي لقى فيك الشهامـه والاصـرار= يلقاك رابح فـي زمـان المخاسيـر
واللي نصاك وردته عنـك الاعـذار= مايدري انك فـوق كـل المعاذيـر
عزالله أنك للعطـا ريـف وأمطـار= ياموردً ضامي عجـز يـارد البيـر
وعزالله أنك من صويبين الاشـوار=رأيك يساوي بالفعـل هـدة الطيـر
يحميك رب البيت علاّم الاسرار= ويجيرك الله من صدوف المقادير
لا حرف يوفي لك ولا قـول شعّـار=صيتك تجاوز بالمدى هقـوة الغيـر

حصل على 30 درجة

سعد النفج

16/05/09, (01:26 PM)

الشاعر / بدر الحنيف

أستبشري يا موطـن العـز والشـان=وزفي من الفرحة قصيد ومعاني
نركع لوجـه الله شكـر ٍ وعرفـان=يوم ٍ سلم راسك عسى الشر فاني
يا مير ماهي كبوة حصان .. وأحصان=شف المرض كنـه لسمعتـك عانـي
يبغـا يجـرب وقفتـك يـا كحيـلان=ويبغا يروم مـن البيـاض المعانـي
جعل العوافي .. ثـوب يلبسـك غفـران=فوق الهنا .. تطحن متون الهواني
ما فيه سلطانين .. بـس فيه سلطـان=قّم يا المرض .. ما فيه سلطـان ثانـي
من مرضتك .. والحزن طاغي وعميان =يا كثر ماهو كـان شرس وأنـاني
ما أقول : ساد الحزن .. والدمع طوفان=أقول : ماغيره لقينا .. مواني
خطاك ســو .. الوقت يا خير الأزمان=أجــر وعوافي يا عريب المجاني
شفاك رد الروح في كل الأركـان=وأشرق لنا شمس الفرح والأماني
لو الكرم ينطق حكا .. سـر وأعلان=من مرّضتك .. شـفني فقدت إتزاني
شفهم ثكالى .. من أرامل .. ويتمـان=عانق لــ فرحتهم .. سهيل اليماني
طارت فرح .. تربـه .. و موطـن .. وسكـان=عقب الجراحة بالعوافي مصاني
حتى مسير الوقت من قمت فرحـان=تركض على عـد الدقايـق .. ثوانـي
لأنك تطق الروس ويطيح .. شيطان=ولانك شمـوخ لطاعـة الله حـانـي
ولانك نموذج عطف وإكـرام واحسـان=ولانك تعـم الخيـر قاصـي ودانـي
وإذا الفقر يصبح لهـب راس نيـران=سلطان غيمة صبّـت الغيـث هانـي
عـدو فقر الناس .. لا .. غيـث الأمـزان=الرمز الأعظم .. للكرم في زماني
انسان تتعب كل مـا قلـت : انسـان=مدمـوج رحمـه عنفـوان وتفانـي
يلام من يبكـي غـلا حـب سلطـان؟!=وسلطان مـن حبـه يعقـد ألسـانـي
يـا والـدي يا سيدي درع الاوطـان=باقي عبـاره تختصر لي بيانـي
ثنتين توجع من معه عقـل وإيمـان=مرّضتك .. وأرهاب ٍعلى الدين جاني
ما فيه سلطانين .. بـس فيه سلطـان=قــم ياالمرض .. مافيـه سلطـان ثانـي
لو فيه والله ما شغل حبه أوطان =ولا أنحنت له بالمحاني .. محاني

حصل على 29.5 درجة

سعد النفج

16/05/09, (01:28 PM)

الشاعر / زياد الشمري

يالله يارحمن ياجزل الاحسان=يارافع ٍ سبع ٍ وسبع ٍ مهدها
الحمد لك ياعالم ٍ كل ماكان=ياخالق ٍ خلقك ومحصي عددها
على سلامة سيد الجود سلطان=نرفع لك كفوف الضراعه ويدها
لاباس ياشيخ الكرم ياكحيلان=أزمه وعدى عن سموك جهدها
ياسيدي سلطان ياطير حوران=ياسيد الأبيات واللي قصدها
متباشرين بعودتك يابليهان=الشعب كله فرحته مابعدها
لنك كسبت قلوبنا كل الاحيان=حييت ياسيد القلوب وسعدها
الكل ياشوق الغنادير فرحان=الله يمدد في سنينك وامدها
لايابعد حيي وميتي والاعيان=تفداك نفسي لو تصير بلحدها
بحر العطا يمناك ياذرب الايمان=يامزنة ٍ غرا تهامل بردها
يابو اليتيم وملتجا كل بلشان=يافزعة اللي حاجته ماوجدها
ياسيدي ياللي لك الطيب عنوان=في غيبتك روحي تزايد لهدها
مافاد به سمرة سوالف وخلان=وهموم بالي زاد بعدك عددها
هم ٍ غدى في غيبتك ماله اوزان=واللي خفى يامير أمر وادها
والحمد لله إنجلت كل الاحزان=في رجعتك نفسي تلاشى نكدها
أبطلب اللي فارض خمس الاركان=يحميك من شر النفوس وحسدها
وختامها صلو عدد وبل الامزان=على نبي ٍِ سنته مابعدها

حصل على 29 درجة

سعد النفج

16/05/09, (01:31 PM)

الشاعر / ماجد الجعفري

ياهجوس الشعر صور قمة الفرحه تعال =اقبل وكلك شموخ/ن تحمل الوصف الجميل
جيتك انخاك و تولّم عند ما جاني مجال =واعرفك لامن نخيتك عن مساري ماتميل
افزع بوصف الشعور اللي سكن صدري وطال=افزع بهمة شجاع/ن يسمع لخيله صهيل
فارس/ن ليانتخيبه استلم سيفه وصال=يشبه العبد العزيز الفارس الفذ النبيل
سيف ساطي في هجومه مانحنى وقت النزال=لارفع باليد سيفه انحنى خصمه ذليل
شيخٍ عزومه قويه للوفا مضرب مثال=تسيد الحكم بجداره وارتكى الحمل/ن ثقيل
ايه ياهاجس تقدم واثق الخطوة عدال =اطلق عنان القوافي كنها الخيل الأصيل
مد بالساحه نفوذك لاتهاب الانحلال=امتلك عرش الجزاله دامك لأسمي وكيل
واقبل بصورة كريمن مايمد الا الجزال=مثل ابو متعب بطبعه شامخ ومده جزيل
وفوق منبرنا المثالي امتثل للارتجال =وانهمك في وصف موقف ماله بوصفه مثيل
يوم فرحة عمر حلت والحزن شدالرحال=واقبل النور بشعاعه وانجلى غيم/ن وليل
لان سلطان الشهامه عنه كل الشر زال=وضحكة الدنيا بشفائه والفرح جاله سبيل
و صدري المشتاق فز و احيا داخله احتفال=اصدر و اعلن بيان/ الحزن بإذن الله قتيل
وحلت الفرحه مكانه واكتست كل الجمال=كنها أجمل فتاة/ن أقبلت تنقض جديل
فرحة العمرالثمينه ماتبي عنها سؤال =رجعتك اعظم بشارة سيدي دوك الدليل
شف شعور الشعب يمك فاق تصوير الخيال=لوشعربه كل حاكم قال هذا مستحيل
شف فرح اهل الجنوب بعين سكان الشمال=وابتسامة اهل جده عانقة صدر الجبيل
إيه في رجعت سموك كم غصن ازهر ومال= وسرت العين برجوعك وابتهج صدرن عليل
شوفتك والشاهد الله سيدي هي راس مال= وبعدك الدنيا زهيده ماطمع فيها بخيل
أنت فيك الطيب عامر نستظله كاظلال=وكل من يزبن سموك يلقى في صدرك مقيل
وانت صورة للشموخ اللي سكن صم الجبال= وانت في وجه المعادي حد كالسيف الصقيل
يعني الوجه الحقيقي سيدي لارقى الخصال=ويعني بجمله مفيده شيخ للطيب وكفيل
سيدي هذا شعور الكل مافيها جدال= ومهما قلنا في سموك مانوفيك الجميل
مالنا الا نطلب الله الكريم وذو الجلال= يحفظك يالوافي لنا ويمدك بعمرٍ طويل

حصل على 28.5 درجة

أبو غرام

16/05/09, (01:33 PM)

الله الله الله

صح لسانهم جميع

وبيض الله وجههم وماقصروا وحظ اوفر لكل من لم يحالفه الحظ

الف شكر اخي سعد

وجمّل الله حالكم على هالمجهود الطيب

فائق الود والتقدير

كاتب الجعفري

16/05/09, (01:42 PM)

مبروك للفائزين والجميع ماقصر

تهانينا للجميع

جبار بن عابر

16/05/09, (01:45 PM)

بيض الله وجيه الشعراء والاخت الشاعره فاطمـه

والواقع استمتعت جداا بقراتي لهذه النصوص الجميله .

الف مبروك للفائزين . والحمد لله على سلامة سمو الامير سلطان بن عبدالعزيز

وماهو غريب هذا الشعور النبيل تجاه ولي العهــــد , حفظه الله

وفق الله الجميع لكل خير .. واشكر اخي مشرفنا الشاعرالرائع / سعد النفج . على هذا الجُــهد ,

والشكر موصول للاداره الموقره .

شاعر البيتين

16/05/09, (02:57 PM)

السلام عليكم ورحمة الله وبركاته..

أبارك لأخواني وأختي فاطمه الجعفري على حصولهم على المراكز العشر الأولى ألف ألف مبروك ..

أتشرف بأن يكون أسمي ضمن العشر الآوائل في مسابقة كبرى بهذا الحجم ..ضمن كوكبه مميزه من الشعراء الكبار ..

كما لايفوتني بأن أقدم شكري وأمتناني للجنة المسابقه ممثله في أساتذتي الكرام /

1- الأستاذ/ محمد المقبل
2- الأستاذ/فواز الغسلان
3- الأستاذ / صالح الضويحي
4- الأستاذ/ خلف الغريب

وشكر من القلب للأستاذ القدير / هندي المقبل على جهوده المتميزه ..
وشكر خاص للأستاذ القدير / سعد النفج المشرف على المسابقة الشعريه على جهده الواضح ..
وشكر خاص للأستاذه القديره / الجادل المشرفه على المسابقه الثقافيه..
وشكر خاص للأستاذ/ نافع عيد الجديد المشرف على مسابقة الألغاز..

كما لايفوتني أن أبارك للأخوه الفائزين با المسابقه الثقافيه ومسابقة الألغاز وألف مبروك / للأستاذ/ عبد العزيز السعود ..

ألف مبروك لكم .. ودامت أفراحكم..

تحياتي للجميع..

سعود المسعودي

16/05/09, (03:17 PM)

صح لسانهم جميع

وبيض الله وجههم وماقصروا وحظ اوفر لكل من لم يحالفه الحظ

الف شكر اخي سعدالنفج على هالجهد المبارك بارك الله فيك

نافع عيد الجديد

16/05/09, (03:20 PM)

السلام عليكم ورحمة الله وبركاته..

أبارك لأخواني وأختي فاطمه الجعفري على حصولهم على المراكز العشر الأولى ألف ألف مبروك ..

أتشرف بأن يكون أسمي ضمن العشر الآوائل في مسابقة كبرى بهذا الحجم ..ضمن كوكبه مميزه من الشعراء الكبار ..

كما لايفوتني بأن أقدم شكري وأمتناني للجنة المسابقه ممثله في أساتذتي الكرام /

1- الأستاذ/ محمد المقبل
2- الأستاذ/فواز الغسلان
3- الأستاذ / صالح الضويحي
4- الأستاذ/ خلف الغريب

وشكر من القلب للأستاذ القدير / هندي المقبل على جهوده المتميزه ..

وشكر خاص للأستاذ القدير / سعد النفج المشرف على المسابقة الشعريه على جهده الواضح ..

وشكر خاص للأستاذه القديره / الجادل المشرفه على المسابقه الثقافيه..

كما لايفوتني أن أبارك للأخوه الفائزين با المسابقه الثقافيه ومسابقة الألغاز وألف مبروك / للأستاذ/ عبد العزيز السعود ..والاستاذ شجاع النومسي 0

كما يشرفني حصولي على المركز الثالث بالمسابقه الثقافيه 0

ألف مبروك لكم .. ودامت أفراحكم..

تقبلوا احترامي وتقديري

سالم صالح

16/05/09, (05:54 PM)

الف الف الف الف مبروووووووووك للفائزين وتستاهلون كل علم غانم

والحمد لله على نجاح هذه المسابقة الكبيرة وسط تواجد شعراء كبار بهذا الحجم وهذا ان دل يدل على التكاتف بين الادارة والاعضاء

فشكراً من القلب لكل من ساهم في انجاح هذه المسابقة

الرائع والمميز الاستاذ/ هندي المقبل

المشرف المتالق / سعد النفج

المشرفة الرائعة والمميزة/ الجادل

المشرف الرائع/ نافع الجديد

ومن تميز الى تميز باذن الله

خلف الغريب

17/05/09, (11:21 AM)

بسم الله والصلاة والسلام على رسول الله ..

كلي فرحة بهذا الجمال وهذه الروح الجميلة وهذا التآلف النادر في هذه الشبكة الكبيرة ..

الف مبروك للفائزين .. واقصد بالفائزين كل من شارك بهذه المسابقات الجميلة التي اثبتت ان الابداع غير محدود لدى شعرائنا ومثقفينا ..

اشكر ادارة الشبكة التي منحتني شرف تقييم القصائد المشاركة واحب ان اثني على المستوى الشعري المرتفع لدى شعرائنا وما انا الا واحد منهم اتعلم منهم ونحن هنا نتكامل سوية في المسير قدما ..

ابارك لأصحاب المراكز المتقدمة واتمنى ان يكون تقدمهم داعما للنجاح دوما :

الشاعر الاستاذ سلامة الجعفري
الاستاذ عبد العزيز السعود ..

كما اشكر اخواني اعضاء اللجنة ومشرفي المسابقات الكرام وادارة المنتدى ممثلة بالاستاذ هندي المقبل والاستاذ محمد الدلماني ..

الى الامام دوما في ويلان ..
بالتوفيق للجميع .

حمد الخمعلي

17/05/09, (11:26 AM)

بيض الله وجيه الشعراء والاخت الشاعره فاطمـه

والواقع استمتعت جداا بقراتي لهذه النصوص الجميله .

الف مبروك للفائزين . والحمد لله على سلامة سمو الامير سلطان بن عبدالعزيز

وماهو غريب هذا الشعور النبيل تجاه ولي العهــــد , حفظه الله
بيض الله وجيه الشعراء جميعً

والواقع استمتعت جداا بقراتي لهذه النصوص الجميله .

الف مبروك للفائزين . والحمد لله على سلامة سمو الامير سلطان بن عبدالعزيز

وماهو غريب هذا الشعور النبيل تجاه ولي العهــــد , حفظه الله

وفق الله الجميع لكل خير .. واشكر اخي مشرفنا الشاعرالرائع / سعد النفج . على هذا الجُــهد ,

والشكر موصول للاداره الموقره .

وفق الله الجميع لكل خير .. واشكر اخي مشرفنا الشاعرالرائع / سعد النفج . على هذا الجُــهد ,

والشكر موصول للاداره الموقره .

ماجد الغانم

17/05/09, (07:17 PM)

بسم الله الرحمن الرحيم

اولاً اتقدم لأدارة المنتدى بالشكر الجزيل على هذه الفكرة الرائعه والأولى من نوعها

ممثلة بالأستاذ هندي المقبل ..والأستاذ محمد المقبل

والأستاذ محمد الدلماني

وبارك الله فيهم على هذا الجهد المميز ...

..
.
واشكرالأخ الشاعر والأستاذ سعد النفج (مشرف مسابقة الشعر)

على جهوده المباركه ومساهمة في أنجاح هذه المسابقه

كما أتقدم للجنة التحكيم بالشكر الجزيل على جهودهم الطيبه
الشاعر و الراوي / فواز الغسلان
الشاعر / محمد المقبل
الشاعر / صالح الضويحي
الشاعر / خلف الغريب

......................
.
.
كما ابارك للأخ والشاعر الأستاذ سلامه الجعفري حصوله على المركز الأول

والأخ الشاعر عبد الله الدغيثرحصوله على المركز الثاني

والأخ الشاعر مرزوق النومان حصولة على المركز الثالث

واهني جميع الشعراء المشاركين بالمسابقه على فوزهم بالتعبير عن اعظم فرحه وهي شفاء سيدي ولي العهد صاحب السمو الملكي الأمير سلطان بن عبد العزيز ال سعود ..حفظه الله .والبسه ثوب الصحه والعافيه

وهذا الشعور ليس بغريب على ابناء هذا الوطن الشامخ

بارك الله بالجميع واسأل الله لهم التوفيق والسداد

الخاطر

18/05/09, (01:52 AM)

الف الف الف مليون مبروك نجاح المسابقه والف مليون تريليون مبروووووووووووووك لجميع الاخوه الفائزين.
الف مبروك لادارة هذا المنتدى وعلى رأسهم الاخ هندي المقبل.
وكما لايفوتني شكر كل من ساهم في انجاح هذه المسابقه من اللجنه
الشاعر والراوي فواز الغسلان
والشاعر محمد المقبل
والشاعر صالح الضويحي
والشاعر خلف الغريب.
وكما لايفوتني شكر الاخ سعد النفج على جهوده الرائعه.
والاخت الجادل على مابذلته من مجهود.
شكرا للجميع والف مليون مبروك للفائزين وحظ اوفر لمن لم يحالفه الحظ في المسابقات الاخرى.